کوروناوائرس نا دین انا سوب آن مچ آ دنیا ٹی 10 کروڑ بندغ نیزگاری نا گواچی مننگ کیرہ، جہانی بینک

اسلام آباد۔ 12 جون (اے پی پی) جہانی بینک پارینے کہ کوروناوائرس نا دین انا سوب آن اینخو نا سال جہانی زرگزران نا حجم اٹی 5 آن ہلیس 8 درسد اسکان نا کمتی گمانی ءِ، ہنداوڑ دا دین انا سوب آن مچ آدنیا ٹی 10 کروڑ بندغ نیزگاری نا گواچی مننگ کیرہ۔ داہیت ءِ جہانی بینک جون اٹی جاری جاچ انا بنداو آ پارینے۔ داکان مست جہانی بینک اپریل اٹی داوخت انا حساب وکتاب نا بنداو آ جہانی زرگزران نا بابت جاچ جاری کریسس۔ جہانی بینک انا پوسکن آجاچ اٹی بیس لائن وڈاؤن سائیڈ منظرنامہ نا رداٹ آخبت نا پیشنگوئی کننگانے۔ بیس لائن منظرنامہ نا رداٹ اگہ دین انا ساڑی حالیت آک برجاسلیسر تو داسال انا ایسر اٹ زرگزرانی بحالی نا عمل بناکننگ نا گمان ءِ۔ بیس لائن نا بنداو آ اینخو نا سال جہانی زرگزران نا حجم اٹی کمتی نا شرح 5 درسد اسکان گمانی ءِ۔ ڈاؤن سائیڈ منظرنامہ نا رداٹ اگہ دین انا تالانی برجاسلیس و داٹی لاک ڈاؤن و ایلو پابندیک برقرار سلرہ تو داٹی بحال نا عمل تاخیر نا گواچی مریک۔ داحالیت آتے ٹی جہانی زرگزران نا حجم 8 درسد اسکان سکڑینگک۔ جہانی بینک انا پوسکن آ جاچ اٹی دا اِرا ٹک آتا بنداو آ نیزگاری نا بابت ہم پیشنگوئی کننگانے۔ بیس لائن منظرنامہ نا رداٹ دین انا سوب آن مچ آ دنیا ٹی نیزگاری ٹی ہنوک آ بندغ آتا کچ 7 کروڑ 10 نا لگ بھگ مننگ کیک۔ ڈاؤن سائیڈ منظرنامہ نا حالیت اٹی نیزگاری ٹی ہنوک آتا بندغ آتا کچ 10 کروڑ آن گدرینگ انگ نا اندیشہ ءِ۔ جہانی بینک 1.90 ڈالر ہڑدے ئی کٹیا کروک آ بندغ آتے نیزگاری نا کیٹگری ٹی تخانے۔ جاچ انا رداٹ سال 2021 ء ٹی جہانی زرگزران اٹی 4 درسد ودکی نا گمان ءِ ولے بروک آ سال اٹی نیزگاری نا کچ اٹی کمتی نا فی الحال ہچ ءُ گمان اس اف۔