بنجائی حکومت اقتصادی سروے 2019-20ء ءِ جاری کرے

اینخو مالی سال اٹی جولائی آن اپریل 2020ء اسکان کھاتہ غاتا نسخان اٹی 70.8 درسد کمتی مسنے، براہ راست درملکی زرکاری ٹی 127 درسد نا ودکی مسنے، جولائی 2019ء آن مارچ 2020 ء مالیاتی نسخان کم مرسا جی ڈی پی نا 4 درسد مس،مالی سال 2020 ء کن جی ڈی پی نا عارضی شرح نمو نا کساس منفی 0.38 مسنے۔ کشاری بشخ انا شرح نمو ٹی 2.67 درسد نا ودکی مسنے۔ خولم ناپیدوار 2 کروڑ 49 لکھ 46 ہزار ٹن ریکارڈ کننگا۔ صںعتی بشخ انا نمو منفی 2.64 درسد و خذمت آتا بشخ انا منفی 5.9 درسد مسنے۔ بھلو کچ اسے آ گڑاتا تیاری نا شرح نمو 5.4 درسد، مالیاتی نسخان 9.1 درسد مسنے۔ شونداری خڑچ آتے ٹی اینخو مالی سال اٹی 14.6 درسد نا ودکی مسنے۔ مالی سال 2019-20ء نا اولیکو 9 تُو اٹی کل محاصل اٹی 30.9 درسد نا نمو مس۔ جولائی آن اپریل2020 ء ٹی ایف بی آر نا خراج وصولی ٹی 10.8 درسد نا ودکی ریکارڈ کننگانے۔ کوروناوائرس نا تالانی کن زرگزران کن نمان چیلنجز مون آ بسنے
اسلام آباد۔ 11 جون (اے پی پی) بنجائی حکومت اقتصادی سروے 2019-20 ء ءِ جاری کرینے ہرانا رداٹ اینخو مالی سال اٹی جولائی آن اپریل 2020ء اسکان کھاتہ غاتا نسخان اٹی 70.8 درسد کمتی مسنے، براہ راست درملکی زرکاری ٹی 127 درسد نا ودکی مسنے۔ جولائی 2019ء آن مارچ 2020 ء مالیاتی نسخان کم مرسا جی ڈی پی نا 4 درسد سلیس، مالی سال 2020 ء کن جی ڈی پی نا عارضی شرح نمو نا کساس منفی 0.38 مسنے۔ کشاری بشخ انا شرح نمو ٹی 2.67 درسد نا ودکی مسنے۔ خولم ناپیدوار 2 کروڑ 49 لکھ 46 ہزار ٹن ریکارڈ کننگا۔ صںعتی بشخ انا نمو منفی 2.64 درسد و خذمت آتا بشخ انا منفی 5.9 درسد مسنے۔ بھلو کچ اسے آ گڑاتا تیاری نا شرح نمو 5.4 درسد، مالیاتی نسخان 9.1 درسد مسنے۔ شونداری خڑچ آتے ٹی اینخو مالی سال اٹی 14.6 درسد نا ودکی مسنے۔ مالی سال 2019-20ء نا اولیکو 9 تُو اٹی کل محاصل اٹی 30.9 درسد نا نمو مس۔ جولائی آن اپریل2020 ء ٹی ایف بی آر نا خراج وصولی ٹی 10.8 درسد نا ودکی ریکارڈ کننگانے۔ کوروناوائرس نا تالانی کن زرگزران کن نمان چیلنجز مون آ بسنے۔ مالی حسابات آ بھاز زور انا اندیشہ ءِ۔ جولائی 2019ء آن مئی 2020 ء ٹی عمومی افراط زر انا شرح 10.9 درسد ئس۔ اینخو مالی سال اٹی جولائی آن فروری اسکان برآمد آتے ٹی 3.6 درسد نا ودکی ریکارڈ کننگا و واپاری نسخان اٹی 29.5 درسد نا کمتی مس۔ وزیراعظم نا سلاہکار خزانہ ڈاکٹر عبدالحفیظ شیخ اقتصادی ٹیم اتون اوار پنچ شنبے نادے آ داڑے اسہ پریس کانفرنس اسے ٹی اقتصادی سروے ءِ جاری کرے۔ سلاہکار خزانہ پارے کہ کوروناوائرس تالان مننگ آن زرگزران کن نمان چیلنجز مون آ بسنے، خاص وڑاٹ مالی حساب آتیا بھاز زور بننگ نا اندیشہ ءِ ، کوروناوائرس نا زہم تیان زرگزران و مخلوق ءِ بچفنگ نا فیصلہ کننگا، 1200 ارب نا اسہ پیکج اس تننگا۔ مرکزی بینک انا کمک اٹ ہم آسراتی تسن۔ دا پیکج اٹی اسہ کروڑ اسہ کروڑ 60 لکھ خاہوت آتے 12 ہزار روپئی تننگا، داوخت ا سکان اسہ کروڑ خاہوت آتے پیسہ تننگانے، دا مچ آ دنیا ٹی نمان ءُ عمل اسے، مچ آ دنیا خنا کہ پاکستان تینا شاری تا بے پرخ کمک ءِ کرے۔ اوپارے کہ بزغر آتا راجی آسراتی کن خولم نا ہلنگ ءِ پک کننگانے۔ چنکا و نیامئی درجہ نا صنعت آتے کن مسہ تُو انا بجلی حکومت ایتک۔ بل آتے موخر کننگتنے، بل حکومت اداکیک، داڑآن کاروباری سرجزآتے بحال کننگ اٹ کمک رسینگک۔ کشت وکشار کن پنجا ارب نا خصوصی اسکیم اس اتنگا، یوٹیلٹی اسٹور تیکن اسہ کروڑ خاہوت آتسکان سرمننگ نا پارت کرین و دارداٹ پنجا ارب روپئی جتا کرین۔ اوپارے کہ داپیسہ غاتے کُن و خور انا بنداوی گڑاتا نہاد آتے ٹی کمتی کن خڑچ کننگا۔ اوپارے کہ روچہ مبارک اٹی 28 ارب روپئی نا سبسڈی تننگا۔ اوپارے کہ پوسکن آپاکستان نارداٹ نزور تپہ ءِ اُراجوڑ کننگ اٹ آسراتی کن 30 ارب روپئی تخنگانے، داٹی خراج نا ہلنگ ہم اوار ءِ۔ جوڑ جاڑی بشخ اکن پورو پیکج تننگا، دا بشخ اکن خراج آتے کم کننگا۔ کم کٹیا کروک مخلوق کن کم خراج اٹی ہم 90 درسد چھوٹ تننگانے۔ سلاہکار خزانہ پارے کہ حکومت ءِ اقتصادی تنکی میرات اٹی ملا۔ برآمد آتے ٹی جمود ئس، زرمبادلہ نا کوڑی بیرہ 9 ارب ڈالر سلیسوسس۔ زرگزران ءِ چلیفنگ مشکل مسوسس، وامک ودسا 25000 ارب اسکان سرمسوسر، کل وامک 30000 ارب اسکان سرمسوسر، نن برآمدی بشخ ءِ مراعات تسونن، 20 ارب ڈالر نا واپاری نسخان ءِ کم کرسا 3 ارب ڈالر آ ایسونن۔ 5 ہزار ارب روپئی نا وام تے پدی تننگا وسخت گام گیج آتے اٹ حکومتی خڑچ آتے کم کرینن۔ اوپارے کہ اینخو سال مرکزی بینک آن ہچ ءُ وام اس ہلتون۔ مخلوق نا فلاح کن وسیلہ غاتا دوئی کننگ ءِ پک کننگ کن خراج تا کارکڑدگی ٹی گچینی ایسونن، خراج وصولی ٹی 17 درسد نا ودکی مسنے، اگہ ہنداوڑ معاملہ غاتا چلینگارہ تو 27 درسد خراج کٹیا ٹی ودکی مسکہ۔ نن واپاری تعلقداری تے سوگو کرین، برآمد کنندگان آتے آسراتی تسونن۔ وزیراعظم نا وژن نا رداٹ نزور تپہ غا چکار کرینن۔ کم بجٹ آن پد ہم احساس پروگرام نا بجٹ ءِ دوگناکننگا۔ اونا فنڈ ءِ 90 ارب روپئی آن ودفسا 192 ارب روپئی کننگا۔ اوپارے کہ قبائلی علاقہ غاتے کن 152 ارب روپئی جتا کرینن۔ بجٹ اٹی نان خراج کٹیا 1100 ارب روپئی نا جاگہ غا 1600 ارب روپئی نا کچ آ سرمس۔ اوپارے کہ کوروناوائرس آن مچ آدنیا زہمی مسنے۔ آئی ایم ایف پارے کہ پدتموک ملک آک غٹ آن زیات زہمی مسنو۔ جہانی خواست کم مننگ آن برآمد آتے ٹی کمتی بس، دین آن ملکی جی ڈی پی ءِ مسہ ہزار ارب نانسخان نا کساس ءِ خلنگا، کٹیا 0.4 درسد کم مس۔ اوپارے کہ مسٹ آن مسٹ ءُ نیم درسد قومی کٹیا ٹی نسخان مس، برآمدآک زہمی مسر۔ ایف بی آر خراج وصولی 4700 ارب روپئی اسکان سرمننگ نا جاگہ غا 3900 ارب روپئی اسکان سرمریک۔ 900 ارب روپئی ناخراج وصولی ٹی نسخان مس۔ اوپارے کہ نن پین بھاریم الس آ شاغنگ خواپنہ، مورگیج زرتس اٹی حکومت کمک کن 30 ارب روپئی تخا۔ کم کٹیا والا مخلوق کن اُراتا تفنگ کن لینڈ بینک اس جوڑ کننگک۔ جی ڈی پی نا شرح نمو منفی 0.4 درسد، صںعت منفی 2.64 درسد، کشت وکشار 2.64 درسد، خذٰمت آتا بشخ منفی 3.4 درسد، ٹرانسپورٹ منفی 7.1 درسد، مینوفیکچرنگ منفی 2.9 درسد مس۔ مالی نسخان جی ڈی پی نا چار درسد مس، تدوک آ سال 5.1 درسد ئس۔ کوشست ءِ کہ بروک آ بجٹ اٹی مخلوق ءِ پین آسودہی ایتن۔ راجی رکھ ءِ سوگو کین و پوسکن ءُ خراج خلپن، مخلوق ءِ اقتصادی آسودہی ایتن۔ مئی نا تُو اٹی برآمد آتے ٹی ودکی خننگا۔ اوپارے کہ خراج اٹی 17 درسد ودکی مستین نا برعکس سہی ئس۔ چیئرپرسن ایف بی آر پارے کہ محصولات آتے ٹی 17 درسد ودکی مس۔ دا تدوک آ دہ سال انا بڑزنو انگا کچ ءِ۔ داٹی انکم خراج اٹی 27 درسد ودکی مس، سیلز خراج اٹی 21 درسد ودکی مس۔ بنجائی وزیر اقتصادی امور خسروبختیار پارے کہ جاری نسخان 3.3 درسد ءِ۔ جی 20 ملک آتیان وام تیٹی اسہ ارب 80 کروڑ ڈالر نا ریلیف ملا۔ آئی ایم ایف 1.4 ارب ڈالر تس۔ ایشیائی شونداری بینک 50 کروڑ ڈالر تس۔ اوپارے کہ 9.7 ارب ڈالر نا زرمبادلہ ناکوڑی میرات اٹی ملاہرا حکومتی گام گیج آتیان 18 ارب ڈالر آن ودانو۔ وزیراعظم کشاری ہلہلہ ئی بنداو تیا 300 ارب روپئی جتا کرینے۔ داڑآن کشاری پیداوار و دیر انا گرج ءِ پورو کننگک۔ مچ آ دنیا، آئی ایم ایف، اے ڈی بی دانا معترف ءُ۔