وزیراعظم عمران خان نا پاکستان ریلوائی نا اول سرآن تنظیم اٹی پیش رفت نا بابت جاچ دیوان آن تران

اسلام آباد۔ 11 جون (اے پی پی) وزیراعظم عمران خان پارینے کہ پاکستان ریلوائی ءِ نسخان آن کشسا کٹیا کروک ادارہ اس جوڑ کننگ ساڑی حکومت نا اولیت ءِ، ادارہ نا اول سرآن تنظیم و حقی بدلی اتنگ نا عمل ہموخت آ پورو مریک ہراتم الس تینٹ دا بدلی ءِ محسوس کیرہ و داڑآن فائدہ ہرفرہ، ریلوائی نا اول سرآن تنظیم ءِ ایم ایل ون ڈٹ انا رداٹ پورو کننگے، ہراتسکان مننگ کے مسافر آتے اوفتا درگہ اسکان ٹکٹ آتے سرکننگ نا بست وبند ءِ پک کننگے۔ داخیال آتا درشانی ءِ او پنچ شنبے نادے آ پاکستان ریلوائی نا اول سرآن تنظیم اٹی پیش رفت نا بابت جاچ دیوان نا کماشی ءِ کرسا کرے۔دیوان اٹی بنجائی وزیر ڈٹ بندی اسد عمر، بنجائی وزیر حوالکاری و شینکاری سینیٹر شبلی فراز، خصوصی کمکار لیفٹیننٹ جنرل (ر) عاصم سلیم باجوہ، خصوصی کمکار ادارہ جاتی اصلاحات ڈاکٹر عشرت حسین، سیکرٹری ریلوائی و ایلو سینئر آفیسر آک ساڑی ئسر۔ سیکرٹری ریلوائی وزیراعظم ءِ پاکستان ریلوائی نا اول سرآن تنظیم، ادارہ ٹی آٹومیشن وڈیجیٹائزیشن، پاکستان ریلوائی نا میرات آتا گچین بست وبند، ایم ایل۔ ون ڈٹ اٹی پیش رفت، ریلوائی ٹی نجی بشخ انا اوار مننگ و خاص وڑاٹ نجی بشخ انا شریداری آن پبلک سیکٹر ڈویلپمنٹ پروگرام (پلس) ءِ عملی دروشم اس تننگ نارداٹ ریلوائی نا کنڈآن سلاہ ئی ڈٹ آتا بارواٹی بریف کرے۔ وزیراعظم ءِ پاننگاکہ کورونا ساڑی حالیت آتارداٹ پاکستان ریلوائی نا کنڈآن ٹرین ہسپتال درستی راستی کرفنگانےو مچ آ ملک انا ریلوائی اسٹیشن و ٹرین تیٹی کوروناغان بچنگ نا بابت ایس اوپی تیا عملدرآمد آ خصوصی چکار کننگانے، دا گام گیج آتے ملکی و درملکی کہول آ پذیرائی ملانے۔ ریلوائی نا نظام ءِ گچین کننگ کن بست وبندی کہول آ ہرفوک آ گام گیج آتیا ہم سرجم حوال تننگا۔ وزیراعظم ءِ پاننگاکہ پاکستان ریلوے مسافر آتا آسراتی کن ای۔ٹکٹنگ نا نظام آ خصوصی چکار کرینے۔ داوخت 60 درسد بکنگ آن لائن نظام نا رداٹ کننگ انگ ءِ ہراڑآن نئے بیرہ مسافر آتے آسراتی ملک بلکن وڈی خوری و نغڑد نا ویل آتا مون ءِ توننگ اٹ کمک رسینگانے۔ ٹرین تے چلیفنگ اٹی نجی بشخ انا شریداری نا بابت پاننگاکہ دا وخت آ اِرا مسافر ٹرین نجی بشخ انا حوالہ کننگانے و 15 پین نجی بشخ انا کمک اٹ چلیفنگک ۔ ہنداوڑ اِرا مال بردار ٹرین ہم نجی بشخ انا کمک اٹ چلیفنگ انگ ءِ، پین اِرا مال بردار ٹرین تا بست وبند نجی بشخ انا حوالہ کننگک۔ ریلوائی نا میرات آتا گچین بست وبند ءِپک کننگ نا بابت پاننگاکہ دا رداٹ ریلوائی نا غٹ میرات آتا ریکارڈ ڈیجیٹلائز کننگ انگ ءِ۔ ریلوے نا کٹیا ٹی ودکی کن 25 ہند آتا پیدواری ءِ کننگانے ہرافتے جوائنٹ وینچر نا رداٹ کاریم اٹ اتنگ انگ ءِ۔ داڑتون اوار اوار ریلوائی نا ڈغار تے ناروا کوزہ غاتیان ہلفنگ اٹ پیش رفت نارپورٹ ہم پیش کننگا۔ نجی بشخ انا شریداری آن پبلک سیکٹر ڈویلپمنٹ پروگرام (پی ایس ڈی پی پلس) نا رداٹ 25 ڈٹ آتا پیدواری ءِ کننگانے ہرافتیا نجی بشخ انا کمک اٹ عملدرآمد کرفنگک۔ وزیراعظم ریلوائی نا اول سرآن تنظیم نا بابت داوخت اسکان نا پیش رفت آ است جمی نا درشانی ءِ کرسا پارت کرے کہ ریلوائی نا گچین بست وبند ءِ پک کننگ کن سی ای او نا تعیناتی نا عمل ءِ زوت آن زوت پورو کننگے۔ دا بابت ملکی و پیشن نا ملک رہینگوک پاکستانی افرادی قوت آتا آزموندہ غاتیان ہم فائدہ ہرفنگے۔ وزیراعظم نجی بشخ انا رداٹ ٹرین تا بست وبند انا گام انا ستاءِ کرسا پارت کرے کہ پین 15 ٹرین تا بست وبند ءِ نجی بشخ انا حوالہ کننگ نا عمل ءِ زوت آن زوت پورو کننگے۔