وزیراعظم عمران خان الس ءِ مدام کورونانا بابت شعور ترساکرینے، وزیر مملکت موسمیاتی بدلی زرتاج گل

اسلام آباد۔ 11 جون (اے پی پی) وزیر مملکت موسمیاتی بدلی زرتاج گل پارینے کہ وزیراعظم عمران خان الس ءِ مدام کوروناوائرس نا بابت شعور تننگ تون ملک اٹی زرگزرانی سرجز آتا بحالی ءِ خواہک۔ اووخت اس ہم پاتنے کہ کوروناوائرس آن بے فکر مرسا چکر خلین و غٹ پابندی تے ہرفنگانے۔ اپوزیشن دا بابت سٹی ءُ پروپیگنڈا کننگ ءِ۔ ٹویٹر آ جاری بیان اٹی زرتاج گل پارے کہ وزیراعظم عمران خان ملک ءِ ڈوبینگ انگ آن بچفنگ کن زرگزرانی سرجزآتے برقرار تخنگ نا پارے۔ ولے اوڑتون اوار رکھی گام گیج آتیا عملدرآمد ءِ پک کننگ نا ہم پارت کرے۔ اپوزیشن دابابت پروپیگنڈاتالان کننگ ءِ۔ اوپارے کہ وزیراعظم عمران خان وخت اس ہم داپاتنے کہ انتس کہ مرض ءِ کیر ہچ ءُ مسئلہ اس اف۔ بلکن او مدام الس ءِ شعور تسنے۔ اوپارے کہ (ن) لیگ نا راہشون تا کورونانا دین انا بابت قول و فعل اٹی تضاد ءِ وخت اس اوپارہ کہ کورونا نا خلیس ءِ و وخت اس او ماڈل ٹاؤن نا پیشن مچی کیرہ۔ زرتاج گل پارے کہ اپوزیشن نا داراہشون تا رویہ بے کچ غیر زموارانہ ءِ ہراسراسر غلط بیان کننگ ءُ کہ وزیراعظم بے فکر مرسا چکر خلنگ نا پارینے و غٹ پابندی تے ہرفینے۔