وزیر خارجہ مخدوم شاہ محمود قریشی نا دیوان آن تران

اسلام آباد۔ 11 جون (اے پی پی) وزیر خارجہ مخدوم شاہ محمود قریشی پارینے کہ پاکستان اوغان امن عمل اٹی، خلوص نیت اتون تینا خیرخواہی کڑد ءِ ادا کرسا کیک، بھارت ڈیہہ نا امن و سوگوی ءِ تینا ہندوتوا پالیسی تا کمک اٹ شیف و بڑز کننگ خواہک، جہانی برادری ءِ حالیت آتا نوٹس ءِ ہلوئی مریک۔ او پنچ شنبے نادے آ جہانی دینی حالیت، علاقائی و ملکی سلامتی نا بابت بڑزکو کہولی دیوان نا کماشی ءِ کریکہ۔ دیوان اٹی وزیراعظم نا سلاہکار قومی سلامتی معید یوسف، سیکرٹری خارجہ سہیل محمود، وزارت خارجہ نا سینیئر آفیسر و بڑزکو عسکری کمامدارآک ساڑی ئسر۔ دیوان اٹی کورونادین انا زہم، ڈیہہ ٹی امن و ایمنی نا حالیت آتون اوار چندی خارجہ پالیسی باندات آتیا گپ وتران کننگا۔ وزیر خارجہ پارے کہ پاکستان اٹی کورونادین ترندی اٹ ودنگ ءِ ننے رکھی گام گیج آتے تینا کرسا بحیثیت قوم دا دین ءِ شکست تروئی مریک۔ کوروناوائرس نا تالانی نا مون ءِ توننگ کن غٹ تر وسیلہ غاتے کاریم اٹ اتنگ انگ ءِ ۔ شاہ محمود قریشی پارے کہ اسہ کنڈآ دنیا کورونا کون آ جہانی دین اتون مون تننگ اٹ اختہ ءِ تو ایلو کنڈآ بھارت، ڈیہہ نا امن و سوگوی ءِ تینا ہندوتوا پالیسی تا کمک اٹ شیف و بڑز کننگ خواہک۔ بھارتی کوزہ گر فوج، تدوک آ دہ تُوآن بدترین کرفیو تون مون تروک کودک کشمیری تیا ظلم و ستم کننگ ءِ۔ وزیر خارجہ پارے کہ انسانیت نا برخلاف بھارتی ڈوہ انا لڑ مرغن مرسا ہِننگ ءِ ڈیہہ ٹی امن و سوگوی نا بقاء کن، جہانی برادری ءِ دا حالیت آتا نوٹس ءِ ہلوئی مریک۔ اینو بھارت سرکار نا برخلاف ہندوستان ناتہہ غان توار بڑز مننگ ءِ۔بھارت نا انتہاپسند دروشم دنیا نا مون آ پاش مسنے۔ دیوان اٹی اوغانستان اٹی دیرپاامن نا کوشست آتا بابت ہم سرجم گپ وتران کننگا۔ وزیر خارجہ پارے کہ پاکستان اوغان امن عمل اٹی، خلوص نیت اتون تینا خیرخواہی نا کڑد ءِ ادا کرسا کیک۔