ڈیہہ نا غٹ ملک آک بھارت آن بدبیسہ ءُ،
اسلام آباد۔ 11 جون (اے پی پی) وزیر خارجہ مخدوم شاہ محمود قریشی پارینے کہ ڈیہہ نا غٹ ملک آک بھارت آن بدبیسہ ءُ، خلیج نا ڈیہہ نا مسلمان تا جوزہ و احساس آک بھارت نا بارواٹی جوان افس، بھارتی رویہ غان اوفتا است آک خراب مسر۔ پنچ شنبے نادے آ تینا اسہ بیان اسے ٹی وزیر خارجہ پارے کہ پاکستان، ڈیہہ ٹی امن و سوگوی نا خواہندار ءِ۔ ننا چکار اوغانستان آٹی ءِ نن اوغان امن عمل ءِ مون آ دننگ آ چکارتخانن، نن کشمیر نا ویل انا ایسر ءِ خوانہ، نن ہندوستان نا بربریت نا برخلاف توار بڑز کرسا کینہ۔ اوپارے کہ اگہ ہندوستان دا سمجھک کہ نن اونا دھڑکو تیان کشمیری تا مخ تفی آن پدی مرینہ تو دا غلط گمانی ءِ ہرادے او است آن کشے۔ ننا موقف اصولی ءِ و نن اصولی موقف آ سلوک اُن جہانی حالیت آک ننا موقف نا تائید ءِ کیرہ۔ وزیر خارجہ پارے کہ اقوام متحدہ نا سلامتی کونسل و او آئی سی نا قراردادآک تنازعہ جموں و کشمیر آ ننا اصولی موقف ءِ سوگوی ایترہ۔ امیت شاہ، نریندر مودی ئسک پار کہ لداخ اٹی انت مننگ ءِ؟ ہندوستان نا میڈیا انت اکن چُپ ءِ۔ مچ آ دنیا نا میڈیا پاننگ ءِ کہ نی تینا ایریا ءِ سرنڈر کریس، نی متنازعہ علاقہ ٹی شرارت کریس، داڑآ ردعمل فطری ئس۔ نن تو تینا دفاع ءِ اللہ نا کرم اٹ کینہ، نی لداخ آ ورندی ایت؟ انت نا سرجیکل اسٹرائیک نا رعب بیرہ پاکستان کن ءِ؟ شاہ محمود قریشی پارے کہ ہندوستان زرگزرانی وڑاٹ ترخانے، یونیورسٹی آف شکاگو، یونیورسٹی آف پینسسلوینیا، تینٹ بھارتی زرگزرانی پٹ وپولی مرکز نا رپورٹ داہیت انا شاہدی ءِ۔ داادارہ غاتا رپورٹس آک پاننگ ءُ کہ لاک ڈاؤن نا سوب آن بھارت نا ستیاناس مسنے۔ 84 درسد خاہوت آتا کٹیا تمانے۔ 11 سال اٹی بھارت اٹی داخہ کم شرح نمو الوکہ ہراکوروناغا غلط حکمت نا سوب آن مسنے۔ بھارتی شاری تیکن خور و غذائی کاختی نا چیلنج بھاز ودانے، مخلوق ڈپریشن نا گواچی مننگ ءُ۔ اُراتیٹی بیدادی ودانے، بھارتی حکومت بے سہب مسنے۔ داحالیت آتے ٹی چکار ءِ اسہ کنڈ کننگ کن بھارت دھڑکو ایتک وپاکستان نا برخلاف جارحیت نا بیان ایتک۔ بھارت ءِ جموں و کشمیر و لداخ اٹی بوز اٹ کُننگ ءِ۔ زرگزران برباد و اپوزیشن بھارتی حکومت آ دوبہ خلنگ ءِ۔
