
اسلام آباد۔8جولائی (اے پی پی):بنجاھی وزیر ءِ اھوالکاری ءُ نشریات عطا اللہ تارڑ ءَ گوشت کہ اسپورٹس احوالکار آنی نیمگ ءَ چہ گراس روٹ تک ءَ بگر داں میاں اوستمانی مقابلہ آں اسپورٹس ءِ سر ءَ چمشانک داتگ، اسپورٹس جرنلزم ءِ دلبڈی مئے اولی ترجی آنی تہ ءَ یک اِنت۔ ما گوں یک انچیں راجے ءَ ھمگرنچ ایں کہ اودا سبزیں ہلال ءِ پرچم ءِ ساہگ ءِ چیر ءَ بے دروریں ٹیلنٹ ھست۔ آئی ءَ راولپنڈی اسلام آباد ءِ اھوالکارانی گل ءِ نیمگ ءَ سئے شمبے ءِ روچ ءَ یک دمگی ھوٹلے ءَ ’’ورلڈ اسپورٹس اھوالکار آنی روچ‘‘ ءِ موہ ءَ برجم داشتگیں مراگش ءَ گوں گشتانک دیگ ءَ ات۔ بنجاھی وزیر ءَ گوشت کہ مرچی اسپورٹس جرنلسٹ آنی واستہ ھاسیں روچ اِنت، اسپورٹس جرنلزم ءَ اسپورٹس سرگرمی آنی سر ءَ چمشانک دیگ، آھاں دیم ءَ برگ ءُ جان سلامتی ءِ مقابلہ ءِ رجحان ءَ را دیم ءَ برگ ءِ تہ ءَ کلیدی کرد پیلو کتگ۔ آئی ءَ گوشت کہ اسپورٹس اھوالکار آنی نیمگ ءَ چہ گراس روٹ لیول ءَ بگر داں میاں اوستمانی تک ءَ مقابلہ آنی تہ ءَ اسپورٹس ءِ سر ءَ چمشانک داتگ ءُ پاکستان ءَ اسپورٹس ءِ راجدپتر ءَ ھرچ نام ءُ شرپ جوڑ بوتگ ایشی ءِ پُشت ءَ اسپورٹس اھوالکار آنی بے مٹیں محنت اِنت۔ بنجاھی وزیر ءَ گوشت کہ اسپورٹس جرنلزم ءَ نہ ایوک ءَ پاکستان ءَ بلکینگ ءَ سرجمیں دگنیا ءَ ورنا لیب کنوک آناں امیت، دلیری ءُ جزم ءِ کلوہ داتگ۔ آئی ءَ گوشت کہ ”کھیل ءِ تب“ ءُ ”گیم ءِ تب“ نہ ایوک ءَ میدان ءَ پیداک بنت بلکیں اھوالکار آنی رپورٹنگ ءَ چہ ھم پیداک بنت کہ آ وتی نبشتانک ءُ اکس آنی وسیلگ ءَ لیبی آنی حوصلہ ءَ را بُرز کن اَنت۔ عطا اللہ تارڑ ءَ گوشت کہ ارشد ندیم ءِ وڑیں راجی بامرد آنی کامیابی بہ بنت یا پاکستان ءِ کرکٹ، ھاکی ءُ باکسنگ ءِ شانداریں دود ءُ ربیدگ بہ بنت اے درستاں راج ءِ دیم ءَ آرگ ءَ اسپورٹس جرنلسٹ آنی ھاسیں کرد انت۔ آئی ءَ گوشت کہ اسپورٹس ءِ سوبمندی ءِ تہ ءَ اسپورٹس جرنلزم ءِ کرد ءَ را منگ ءِ وھد ءَ مارا آھاں مدام دلبڈی دیگی اِنت۔ آئی ءَ گوشت کہ اسپورٹس جرنلزم ایوک ءَ رپورٹنگ ءَ گوں بندوک نہ اِنت، اے انتظامی تک ءَ ھم وتی کرد ءَ پیلو کت کنت، پی ٹی وی اسپورٹس ءَ یک مزنیں اسپورٹس جرنلسٹ ءَ را اسپورٹس ڈیپارٹمنٹ ءِ سروک جوڑ کنگ بوتگ۔ آئی ءَ اے جوانیں روایت ءَ را وتیگ کنگ ءِ ھاترا ایندگہ رسانکدر ءِ ادارگ ھم زور پر دات۔ بنجاھی وزیر ءَ گوشت کہ ھما جاہ ءَ کہ حکومت لیب ءُ گوازی ءِ سرپرستی ءُ دلبڈی کنگ ءَ اِنت، لیب ءُ گوازی ءِ اھوالکاری ءِ دلبڈی ھم مئے ترجی آنی تہ ءَ ھوار اِنت، پاکستان ءِ حکومت ءُ وزارت ءِ اھوالکاری اسپورٹس ءِ اھوالکار آناں ھمک رنگ ءِ کمک یا آسراتی پجاری کنت۔ آئی ءَ گوشت کہ مارا درستاں پھر اِنت کہ ما سبزیں ہلال ءِ بیرک ءِ ساھگ ءِ چیر ءَ یک انچیں راج ءِ گوما ھمگرنچ ایں کہ اودا بے دروریں ٹیلنٹ است اِنت ءُ شمئے وڑیں سرپد، مخلص ءُ محنتی اھوالکار اے پیغام ءَ را دگنیا ءَ را سر کنگ ءِ تہ ءَ راستیں سفیر اَنت۔ آئی ءَ گوشت کہ ھما جاہ ءَ کہ ما اسپورٹس ءَ را دیم ءَ برگ ءَ آں اودا اسپورٹس جرنلزم ءَ را ھم دلبڈی دئیگ ءَ ایں ۔ بنجاھی وزیر ءِ اھوالکاری ءَ اسپورٹس جرنلسٹ ایسوسی ایشن ءِ نوکیں گچین بوتگیں اگدہ دار آناں ھم مبارکی دات ءُ امیت سہرا کت کہ نوک گچین بوتگیں اگدہ دار اسپورٹس جرنلسٹ ءِ دیمروئی ءِ واستہ وتی سرجمیں کرد ءَ برجاہ دار اَنت۔