اسلام آباد ۔ 11 جون (اے پی پی) احساس ایمرجنسی کیش پروگرام ءَ وتی بنگیج ءَ بگر تاں انوگ ءَ تاں 9 ھپتگ آنی تہ ءَ 10 ملین ءَ چہ گیش بزگریں مردم آناں کمک پجارینگ ءِ سیم سر ءَ گوازینتگ ۔ پروگرام ءِ بنگیج 9 اپریل 2020 ءَ بوتگ ایشی ءِ مول ءُ مراد کرورونا وائرس ءِ سبب ءَ لاک ڈائون ءَ آماچیں ھاندان آناں 12000 کلدار یک ھاندان ءَ را زوتیں رنگ ءَ کیش ریلیف پجاری کنگ بوتگ۔ ھواریں رنگ ئَ 12 ملین ءَ چہ گیش ھاندان ءَ 144 ارب کلدار بھر ءُ بانگ کنگ بیت۔ احساس ایمرجنسی کیش بھر ءُ بانگ ءِ ھوالگ ءَ باست ءُ واست بوتگ مزن وزیر ءِ ھاسیں کمکار برائے چاگردی رکھینگ ءُ گریبی ءِ ھلاسی، ڈاکٹر نشتر ءَ گوشت کہ اللہ تعالٰی ءِ کرم ءَ چہ 9 ھپتگ آنی تہ ءَ 10 ملین مردم آناں کمکی زرّ بھر ءُ بانگ کنگ ءِ سیم سر در جتگ۔ آئی ءَ گیش گوشت کہ صوبگ آنی ضلعی انتظامیہ، کانود ءَ را مھکم داروکیں ادارگ ، نادرا ءُ شریکداریں بینک آنی کمک ءَ چہ ما آیوکیں مالی سال ءِ گڈ ءَ تاں 12 ملین مردم آناں کمک پجاری کنگ ءِ سیم سر ءَ در جناں۔ ھواریں رنگ ءَ انوگ ءَ تاں احساس ایمرجنسی کیش پروگرام ءِ کیٹگری 1،2 ءُ 3 ءِ 10.019ملین بزگریں ھاندان آناں ھمک ھاندان 12000 کلدار بھر ءُ بانگ کنگ بوتگ وھدیکہ 121.67ارب کلدار بنت انت۔ اے زرّ احساس ایمرجنسی کیش پروگرام ءِ چیر دستی ءَ مزور ءُ بزگر ءُ گریبیں مردم آناں بھر ءُ بانگ کنگ بوتگ۔ کورونا وائرس ءِ وڑیں ھوپ ءِ آماچیں بزگریں آناں آسراتی پجاری ءِ واستہ سرجمیں ملک ءَ 10,000 ءَ چہ گیش بھر ءُ بانگی جاھ جوڑ کنگ بوتگ۔ احساس پورٹل ءِ سر ءَ استیں صوبائی ءُ دمگی ھال آنی رد ءَ انوگ ءَ تاں پنجاپ ءَ 43.42 ملین بزگر آناں 52.70 ارب کلدار ، سندھ ءَ 30.34 ملین بزگر آناں 36.63 ارب کلدار ءُ خیبر پختونخوا ءَ 18.45 ملین گریب آناں 22.69ارب کلدار بھر ءُ بانگ کنگ بوتگ۔ انوگ ءَ تاں آزات کشمیر ءَ 0.172 ملین ءَ چہ بزگر آناں 2.12 ارب کلدار ، بلوچستان ءَ 0.497 ملین بزگر آناں 6.5 ارب کلدار ، گلگت بلتستان ءَ 70000 ءَ چہ گیش بزگر آناں 88 کروڑ کلدار ءُ اسلام آباد ءِ 46000 ءَ چہ گیش بزگر آناں 56 ارب کلدار بھر ءُ بانگ کنگ بوتگ۔
