مسلم لیگ (ن) 2013 ء ٹی برسراقتدار بننگ تون پاکستان اسٹیل ملز، پی آئی اے، اوجی ڈی سی ایل، بجلی نا بشخوک آ کمپنی تتون اوار ایلو 41 ادارہ غاتے نجکاری نا فہرست اٹی شاغا، پی آئی اے نا نسخان 500 ارب اسکان سرمس، مراد سعید

اسلام آباد۔ 10 جون (اے پی پی) بنجائی وزیر مواصلات مراد سعید پارینے کہ مسلم لیگ (ن) 2013 ء ٹی برسراقتدار بننگ تون پاکستان اسٹیل ملز، پی آئی اے، اوجی ڈی سی ایل، بجلی نا بشخوک آ کمپنی تتون اوار ایلو 41 ادارہ غاتے نجکاری نا فہرست اٹی شاغا، پی آئی اے نا نسخان 500 ارب اسکان سرمس، نن قومی ادارہ غاتے ٹی اصلاحات نا کمک اٹ نسخان ءِ کم کرسا الس ءِ ریلیف تننگ خوانہ، سمندرپار پاکستانیک ننا نہادی میرات ءُ، اپوزیشن اگہ اوفتے کرونا تون گنڈاتو نن داڑآ سخت برانز کینہ، تحریک انصاف نا حکومت ءِ تباہ ھال زرگزران میرات اٹی ملا ولے اوکان پد ہم نن کورونا کون آ دین اتون جنگ تننگ اُن۔ چارشنبے نادے آ قومی اسمبلی ٹی اپوزیشن نا کنڈآن چست کروک آ ٹک آتیا ہیت کرسا بنجائی وزیر مواصلات مرادسعید پارے کہ نجکاری و ادارہ غاتا نسخان معاملہ غا حساب وکتاب ساڑی ءِ۔ 2013 ء ٹی مسلم لیگ (ن) نا حکومت جوڑ مس۔ اوغٹ آن مست 41 ادارہ غاتے نجکاری نا فہرست اٹی شاغا۔ دافتے ٹی پی آئی اے نا نیویارک و پیرس اٹی ہوٹل ، پی ایم ڈی سی، اوجی ڈی سی ایل، پاکستان اسٹیل ملز، پی آئی اے و بجلی نا بشخوک آ کمپنیک اوار ءُ۔ مسلم لیگ (ن) نا حکومت نا آخیریکو تُو اٹی کمیٹی نا دیوان اٹی پی آئی اے نا 500 ارب نا نسخان نا ہیت مس۔ اوپی آئی اے ءِ سہی کنننگ کن 50 لکھ ماہوار تنخواہ غا پیشن آن بندغ ایسُر۔ اونا کماشی ٹی پی آئی اے نا جہاز اس دُزی مس۔ پی آئی اے اوفتا دور اٹی 500 ارب نسخان آ سرمس۔ پاکستان پوسٹ، پاکستان ریلوے، پی آئی اے تون اوار غٹ قومی ادارہ غاک نسخان اٹی ءُ۔ مسلم لیگ (ن) نا دور اٹی پاکستان پوسٹ نا 62 ارب نسخان ئس۔ نن اونا ریونیو ءِ 70 ارب اسکان سرکرین۔ داسہ دا ادارہ نا ریونیو ٹی 110 درسد ودکی مس۔ پاکستان اسٹیل ملز انا بھاز دردناک ءُ کسہ سے۔ 1990ء نا دہائی ٹی اولیکو وار پی ایس ایم نسخان اٹی ہنا۔ داوخت آ اوفتا دورحکومت ئس۔ 2007-08 ء ٹی مشرف دور ئس ہراٹی پاکستان اسٹیل ملز انا کٹیا 9 ارب 20 کروڑ ئس۔اوکان پد پیپلزپارٹی نا دور بس و دا ولدا نسخان اٹی ہنا۔ مسلم لیگ (ن) نا حکومت غٹ ادارہ غاتے سودا کننگ نا پڑو کرے۔ دانجکاری کننگ کریر و نئے اصلاحات اتنگ کریر۔ اوفک تینٹ اسٹیل مل آتے بند کریر۔ میڈیا ءِ تین تون دبو و نشان ایتبو کہ 2015 ء ٹی اوفک اخہ بیدردی اٹ پاکستان اسٹیل ملز آتے بند کریر۔ اگہ دا اسہ ادارہ ٹی پاکستان نا جان جوڑی تعلیم دیر و ایلو گرج آتا زر تننگسا کرے تو ملک ہمہ چلینگک۔