کوروناوائرس نا مقابلہءِ کننگ کن حکومت پبی ءُ حکمت عملی اسے آ عمل کننگ ءِ، ڈاکٹر ظفرمرزا

اسلام آباد۔ 10 جون (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ کوروناوائرس نا مقابلہ ءِ کننگ کن حکومت پبی ءُ حکمت عملی اسے آ عمل کننگ ءِ ۔ جہانی ادارہ جان جوڑی نا چھٹی نا بابت ڈاکٹر ظفرمرزا نا جاری بیان نا رداٹ این سی او سی ٹی ہڑدے حالیت آتا خوڑتی اٹ جاچ ءِ ہلنگک۔ صوبہ غاتون اواری اٹ فیصلہ سازی کننگک۔ ڈاکٹر ظفرمرزا پارے کہ این سی سی ٹی غٹ صوبہ غاک آزاد کشمیر ساڑی ءُ۔ وزیراعظم نا کماشی ٹی غٹ فیصلہ غاتے تین پہ تینی سلابت اٹ کننگک۔ اوپارے کہ پاکستان دنیا نا پنچ میکو بھلا ملک ءِ وخت اس کہ ڈبلیو ایچ او ایمروریجن نا غٹ آن بھلا ملک ءِ۔ اوپارے کہ نن زرگزران نا لحاظ اٹ کم و اوسط کٹیا کروک ملک آتے ٹی برینہ۔ ننا آبادی نا اِرا تہائی بشخ ہڑدے کٹیا غا گزر بسر کیک۔ کورونا نا حالیت آتے مون آ تخسا الس نا گچین فائدہ ٹی فیصلہ کننگک۔ ڈاکٹر ظفرمرزا پارے کہ ننے مشکل ءُ فیصلہ کروئی تمانے۔ حکومت زندو روزگار ہڑتوم آتے بچفنگ دافتا نیام اٹ بریبری تخنگ نا حکمت عملی آ عمل کننگ ءِ ۔ نن دانستہ وڑاٹ ملک اٹی کرار کرار آ لاک ڈاؤن اٹ نرمی کرین و دوکان، مسیت، مارکیٹ، پبلک ٹرانسپورٹ آ ایس او پی تیا عملدرآمد آ زور شاغان۔ ماسک بیننگ ءِ مچ آ ملک اٹی المی گوندنگانے۔ نن بے کچ فعال ءُ ٹریسنگ ٹیسٹنگ کورنٹائن پالیسی اس درستی راستی کرفین ہرانا کمک اٹ وائرس نا تالانی والا علاقہ غاتا پیدواری ءِ کننگ انگ ءِ۔ اوپارے کہ داوخت آ سمارٹ لاک ڈاؤن نا ہفت سد جتا ءُ ہند ءُ ۔ کورونانا بابت ننا حکمت عملی نا اسہ پلو تینا جان جوڑی نا نظام ءِ گچین کننگ نا ءِ۔ ننا پالیسیک پٹ وپول و تکنیکی اعتبار اٹ دوئی کروک آ آزموندہ غاتا بنداو و زرگزران نا حالیت آتے مون آ تخسا جوڑ کننگک۔ جہانی ادارہ جان جوڑی اقوام متحدہ نا جان جوڑی نا اسہ تیکنیکی ءُ ادارہ اسے۔ جان جوڑی نا بابت و ساڑی آ دین انا توننگ کن اواری اٹ کاریم کننگ اُن۔ جہانی ادارہ جان جوڑی ننا کاریم نا معترف ءِ یقینا داادارہ نا کاریم جان جوڑی نا نقطہ نگاہ غان تینا سلاہ تے ڈبلیو ایچ او باسک ملک آتے پیش کیک وخت اس کہ حکومت آتے گچین فیصلہ سازی غٹ بھلا باندات آتے مون آ تخوئی تمک و ملک انا گچین فائدہ ٹی فیصلہ کروئی تمک۔