کراچی جہاز شکست اتون اوار مستین خڑک اٹی مروک آ ایلو شکست آتا رپورٹ آتے 22 جون آ قومی اسمبلی ٹی پیش کننگک، غلام سرور خان

اسلام آباد۔ 10 جون (اے پی پی) شاری ہوابازی نا بنجائی وزیر غلام سرور خان پارینے کہ کراچی جہاز شکست اتون اوار مستین خڑک اٹی مروک آ ایلو شکست آتا رپورٹ آتے 22 جون آ قومی اسمبلی ٹی پیش کننگک، کراچی جہاز شکست نا شفاف جاست وپاست کن ترکی و ایلو جہانی پنی آ ایئر لائن تا ایئر بیس آتا سینئر انگا پائلٹ آتے ہم جاست وپاستی ٹیم اٹ اوارکننگک، 56800 آن زیات پیشن نا ملک اختہ پاکستانی تے وطن آ پدی ایسونن، مستین اٹی پائلٹ آک جعلی لیسن ہم دوئی کریر، دانا ہم پورو جاست وپاست ءِ کرفنگک، پی آئی اے نا روز ویلٹ ہوٹل و بالی پٹ آتے آؤٹ سورس کننگ نا بابت شفاف وڑوڈول اس اختیار کننگک، ہوائی شکست ننکن ندامت نا سوب ءِ ، شفاف جاست وپاست انا کمک اٹ زموارآتا تعین ءِ کننگک۔چارشنبے نادے آ قومی اسمبلی ٹی پالیسی بیان ترسا شاری ہوابازی نا بنجائی وزیر غلام سرور خان پارے کہ 22 مئی آ بدقسمت جہاز سوا یک بجہ غالاہور آن کراچی کن بال کرے و دوبجہ ءُ 39 منٹ آ ششکست نا گواچی مس۔ داٹی 97 بندغ شہید مسر و اِرا خوش قسمت بندغ اللہ نا کرم اٹ بچار۔ داہڑتوم آ بندغ آک ترندی اٹ دراخہ جوڑ مننگ ءُ۔ کل 99 مسافر ئسر ہرافتے ٹی اِرٹ کاکٹ پٹ کریو و 6 کیبن کریو ئسر۔ 97 شہید آتیان 95 میت آتے ڈی این اے نا کمک اٹ درست کننگا۔ اوفتا خاہوت آتے سرکاری خڑچ آ سلفنگا۔ اوفتے مفت ٹکٹ تننگا۔ میت آتے اُراتیا سرکننگا۔ 82 خاہوت ءِ 10،10 لکھ روپئی تننگا۔ انسانی جان نا ہچ ءُ قیمت اس اف۔ خالد شیر دل نا خاہوت تون اوار گڑاس خاہوت دا پیسہ غاتے ہلنگ آن انکار کرینو۔ جہاز تمنگ آن 16 ہند آک بھاز بے وڑ زہمی مسر۔ اللہ ہمو اُراتیٹی رہینگوک آتا جان تے رکھ کرے۔ مسہ چنا کیرغ مرسا ٹھپی مسر۔ اسہ چناس زوال کرے۔ اوفتے ہم زراعانت تننگانے۔ اوپارے کہ شکست نا وخت مخلوق نا جوزہ ہروئی ئسک۔ اوباوری کرفے کہ خلقت نا نسخان تا پی آئی اے، سول ایوی ایشن و صوبائی حکومت نا ادارہ غاتا کمک اٹ سروے مننگ ءِ۔ پنچ خاہوت آتے پی آئی اے نا ہوٹل آتے ٹی سلفنگانے۔ اوپارے کہ قوم جاست وپاست نا بھرم تے ہُننگ خواہک۔ مستین خڑک اٹی شش شکست مسنے۔ بھوجا ایئرلائن نا جہاز اسلام آباد اٹی تما 150 مسافر زوال کریر۔ ایئر بلیو نا جہاز مارگلہ مش تتون ڈوک لگا۔ حویلیاں ٹی تموک آ جہاز، گلگت اٹی کریش لینڈنگ کون آ شکست آتا شفاف رپورٹ مون آ بتو۔ اوپارے کہ دا شکست آتا سوب اس توارے کس اسے تو زموار گوندوئی مریک ۔ داشکست آک ننکن ندامت نا سوب ءُ ۔ نن غٹ دانا زموار اُن۔ گڑاتے سہی کننگ کن شفاف جاست وپاست نا کمک اٹ زموار آتا تعین ءِ کروئی مریک۔