جہانی دینی چیلنج دنیا ءِ بھاز ترندی اٹ بدل کرینے، پین بدلی وخت اتون اوار اوار مون آ بریک، وزیر خارجہ مخدوم شاہ محمود قریشی نا وزارت خارجہ ٹی سینئر آفیسر آتیان تران

اسلام آباد۔ 10 جون (اے پی پی) وزیر خارجہ مخدوم شاہ محمود قریشی پارینے کہ جہانی دینی چیلنج دنیا ءِ بھاز ترندی اٹ بدل کرینے، پین بدلی وخت اتون اوار اوار مون آ بریک، ننے دا ترندی اٹ بدل مروک آ حالیت آتے ٹی مون آ ہِننگ کن تینے تیار کروئی مریک۔ اوچارشنبے نادے آ وزارت خارجہ ٹی سینئر آفیسر آتیان تران کریکہ۔ اوپارے کہ اینو مچ آ دنیا ٹی، بھلو بھلو اہم ءُ دیوان، کانفرنس ویڈیو لنک انا کمک اٹ مننگ ءِ، ننے تینے ڈیجیٹلائز کروئی مریک تانکہ نن تینا نکتہ نظر ءِ گچین وڑاٹ دنیا نا مون آ پیش کننگ کین۔ ننے دا بدل مروک آ دنیا نا تیور آن آگاہی دوئی کرسا تینا حکمت عملی ءِ جوڑ کروئی مریک تانکہ نن تینا خارجہ پالیسی ہدف آتے جوان وڑاٹ ایسر اسکان سرکننگ کین۔ وزیر خارجہ پارے کہ ننا سفارت کار، مچ آ دنیا ٹی سفارت کاری نا اسرارو رموز اٹی چاہنداری نا بابت چاہنگرہ ولے ننے تینا کاریم نا کچ ءِ پین ودفنگ کن اواری اٹ کوشست آتے کاریم اٹ اتوئی مریک۔ ننے تینا طرز عمل اٹی بدلی اتسا، تین پہ تینی رابطہ و سلابت نا کلچر ءِ مون آ دروئی مریک تانکہ ننا کوشست آک زوت و جوان وڑاٹ سرسہبی اٹ ہمکنار مریر۔ وزیر خارجہ پارے کہ وزارت خارجہ ءِ پوسکن آ وڑوڈول آتیا اتنگ کن ہرقابل عمل سلاہ ءِ بخیر اٹ پاوہ۔ اوپارے کہ وزارت خارجہ ٹی پبلک ڈپلومیسی سلابتی پڑک اس جوڑ کننگانے ہراٹی آزموندہ کار چاہندار آتے اوارکننگانے۔ کورونا دین اٹی مچ آ دنیا ٹی ننا سفارت خانہ غاک ہراوڑاٹ پاکستانی کمیونٹی نا کمکاری ءِ کننگ ءُ اونا سفت سوشل میڈیا نا کمک اٹ ملنگ ءِ۔ مخلوق ویڈیو کلہو آتا کمک اٹ وزارت خارجہ و ننا سفیر آتا کارکڑدگی نا ستاءِ کننگ ءُ ہراڑآن ننا حوصلہ پین بڑز مسنے۔