صوبائی دارالحکومت کوئٹہ نا ہسپتال آتے ٹی ناجوڑ تا تناسب اٹ کٹ آتا گنجائشت ارے، پارلیمانی سیکرٹری جان جوڑی بلوچستان ڈاکٹر ربابہ بلیدی

کوئٹہ۔ 08 جون (اے پی پی) پارلیمانی سیکرٹری جان جوڑی بلوچستان ڈاکٹر ربابہ بلیدی پارینے کہ کوروناوائرس نا تالان مروک آ تناسب نا رداٹ صوبائی دارالحکومت کوئٹہ نا بھلا ہسپتال آتے ٹی گمانی حالیت آتون مون تننگ و ناجوڑ آتے گچین وڑاٹ مینج کننگ کن دوئی ساڑی آ بست و بند آتون اوار اوار ترویج آ تالان گیگ بدل ہلہلہ پلان اس جوڑ کننگ المی ءِ تانکہ دوئی ہیلتھ اسٹرکچر آ تموک آ زور ءِ گچین حکمت عملی اٹ بدستور فعال تخنگ مرے و ہسپتال آتے ٹی سرکاری کہول آ ساڑی طبی سرجزآک سے سلنگ آن برجاسلر۔ داخیال آتا درشانی ءِ او کوئٹہ نا چندی ہسپتال آتا میڈیکل سپرنٹنڈنٹس آتا دیوان آن تران کرسا کرے۔ داوخت آ سیکرٹری جان جوڑی دوستین خان جمالدینی ڈائریکٹر جنرل ہیلتھ بلوچستان ڈاکٹرمحمد سلیم ابڑو تون اوار ایلو تعلقدار کمامدار و طبی چاہندار آک ہم ساڑی ئسر، دیوان اٹی بی ایم سی، سول سنڈیمن ہسپتال، شیخ زید ہسپتال، و فاطمہ چیسٹ ہسپتال نا ایم ایس آک جم حالیت آتیا حوال تسر و تینا تینا ہسپتال آتے ٹی کوویڈ پیشنٹ آتا داخلہ نا کچ، دوئی وسیلہ و دمدستی گرج و اولیتی گام گیج آتیان معلومدار کریر پارلیمانی سیکرٹری جان جوڑی ڈاکٹر ربابہ بلیدی پارے کہ داوخت اسکان صوبائی دارالحکومت کوئٹہ نا ہسپتال آتے ٹی ناجوڑ آتا تناسب اٹ کٹ آتا گنجائشت ساڑی ءِ ولے غٹ ہسپتال آتا سروک آتے ناجوڑ آتا کچ اٹی غیر معمولی ودکی نا حالیت اٹی گیگ بدل پلان اس ہم تیار تخرتانکہ پین ہلہلہ ئی حالیت آتے ٹی محکمہ جان جوڑی نا طبی سرجز آتا تسلسل ءِ برجاتخنگ مرے۔ ڈاکٹر ربابہ بلیدی پارے کہ بھاز المی سرجری گائنی و ایلو مرض آتا قابل داخلہ ہندن ءُ ناجوڑ ہراکوویڈ پازیٹیو مرے اوفتے ایلو ناجوڑ آتیان جتاتخنگ کن ہم ہر ہسپتال اٹی خاطر خواہ بست وبند آتے گچین کننگ المی ءِ، اوپارے کہ وزیراعلیٰ بلوچستان جام کمال خان محکمہ جان جوڑی ٹی نافذ ایمرجنسی نا ساڑی حالیت آتا ذاتی وڑاٹ جاچ ءِ ہلنگ ءِ و ہلہلہ ئی بنداو تیا سلاہ تروک آ گام گیج آتیا بلاتاخیر عمل درآمد برجاءِ، دیوان آن تران کرسا سیکرٹری جان جوڑی بلوچستان دوستین خان جمالدینی پارے کہ ساڑی حالیت آتے ٹی ڈاکٹرز و پیرامیڈیکس تون محکمہ جان جوڑی نا انتظامی آفیسر آتیا بھلو زمواری اس مریک کہ او معاملہ غاتا گچینی کن انتظامی فیصلہ سازی نا عمل ءِ السی گرج آتا رداٹ شاغر و دوئی وسیلہ غاتے دا جامع حکمت عملی اٹ کاریم اٹ اتیر ہراڑآن زیات آن زیات مخلوق فائدہ ہرفنگ کیر۔ اوپارے کہ فاطمہ جناح ہسپتال اٹی کوروناوائرس نا ٹیسٹنگ آتا کاریم نا کچ اٹی ودکی کننگانے واسہ پوسکن ءُ مشین اسے نا خلنگ آن پد ٹیسٹنگ نا عمل 500 آن ودسا ہڑدے ئی بنداو آ 1000 آن زیات مسنے دا مشین اٹ کوروناوائرس نا مریض نا فزیکل حالیت نا محتاط جاچ ءِ دہ منٹ اٹ ہلنگ مریک، داکان بیدس کوویڈ پازیٹیو پیشنٹ کن پوسکن ءُ 20 کٹ آئی سی یو، 30 کٹ اسپیشل کیئر یونٹ و 40 کٹ آئی سی یو یونٹ نا فعالیت آ ترندی اٹ کاریم برجاءِ۔