شہید منظور بلوچ تینا مچ آ زند ءِ نظریاتی سیاسی قدر انا مون آ دننگ کن وقف کرے، شہید انا جتائی آن مستونگ تون اوار مچ آ صوبہ اسہ مسیحاسے آن محروم مس، صدر بلوچستان نیشنل پارٹی ضلع کوئٹہ و باسک بلوچستان اسمبلی میر احمد نواز بلوچ

کوئٹہ۔ 08 جون (اے پی پی) بلوچستان نیشنل پارٹی ضلع کوئٹہ نا صدر و باسک بلوچستان اسمبلی میر احمد نواز بلوچ پارینے کہ شہید منظور بلوچ بی این پی نا ہمو سرمایہ افتخار ئس ہراتینا مچ آ زند ءِ نظریاتی سیاسی قدر انا مون آ دننگ کن وقف کرے و قیدوبند انا سختی تے برداشت کرسا تینا جماعت نا سرپرست اعلیٰ سردار عطاء اللہ مینگل نا قومی جہد ءِ مون آ دننگ کن بی ایس او آن ہلیس بی این پی اسکان مثبت فکری و شعوری سوچ انا علمبردار ئس، شہید انا جتائی آن مستونگ تون اوار مچ آصوبہ اسہ مسیحاسے آن محروم مس سینئر باسک و دیرینہ نظریاتی سنگت چیئرمین منظور بلوچ نا ناگہانی رحلت ہردرد مند و عقل و سیاسی شعور تخوک بندغ کن اسہ بھلو صدمہ اسے۔ شہید منظور بلوچ بی ایس او آن ہلیس بی این پی اسکان بلوچستان نا نظریاتی سیاسی اساس و الس اٹ حقی سیاسی شعور انا بیداری کن مخلصانہ جہد کرے۔ داخیال آتا درشانیءِ او بی این پی کوئٹہ نا ضلعی سیکرٹریٹ آن جاری بیان اٹی میر احمد نواز بلوچ پارے کہ دا خبر ننکن بے کچ ڈکھ و دلی کرب انا سوب ءِ کہ چیئرمین منظور بلوچ داسہ ننے آن ہنانے شہید اسہ نظریاتی سیاسی کارندہ اس ئس ہرامشکل انگا حالیت آتے ٹی بلوچستان و داجاگہ نا الس نا حق اکن پرخلوص و بار آور سیاسی پرچار و حق و سچ آ مبنی جہد کرے ہرانا پاداش اٹ اودے قیدوبند و ایلو سخت مشکل آتون مون تروئی تما ولے شہید تینا نظریاتی جہد آن اسہ انچ اس ہم پدی متو و است مونجائی نا جاگہ غا ہر وار پوسکن ءُ حوصلہ و ولولہ اسے تون سرکڑدہ غاتا قومی جہد ءِ اسہ پوسکن ءُ سوگوی اس تس شہید منظور بلوچ امن نا داعی و اسہ سُچا ءُ کارندہ اس ئس ہراتینا کڑد آن پک کرے کہ آسودہی و فائدہ غاتا دوئی کننگ اسہ کارندہ اسے نا شایان شان اف بلکن حقی نظریات آتا مون آ دننگ و بے رنگ و نسل السی خذمت اسہ سیاسی کارندہ سے نا اصل سرمایہ افتخار ءِ میر احمد نواز بلوچ پارے کہ منظور بلوچ ننا سرمایہ افتخار ئس و اونا نظریہ و راہشونی آ تالان جہد غٹ کارندہ غاتے کن تادیر مشعل راہ اس مریک میر احمد نواز بلوچ شہید منظور بلوچ نا درجہ غاتا بڑزی و پدسلوک آتا صبر وجمیل کن دعا کرے۔ اوپارے کہ مچ آ جماعت سوگ انا حالیت اٹی ءِ و نن منظور بلوچ نا خاہوت نا ڈکھ و دڑد اٹی بریبر نا شریک اُن۔