جہانی برادری کشمیر نا ابتر حالیت آتا دمدستی نوٹس ہلے، بنجائی وزیر امور کشمیر و گلگت بلتستان علی امین خان گنڈاپور

اسلام آباد۔ 08 جون (اے پی پی) بنجائی وزیر امور کشمیر و گلگت بلتستان علی امین خان گنڈاپور مقبوضہ کشمیر اٹی برجا بھارتی بربریت نا ترندی اٹ مذمت ءِ کرسا پارینے کہ جہانی برادری مقبوضہ کشمیرنا ابتر ھالیت آتا دمدستی نوٹس ءِ ہلے۔ دوشنبے نادے آ داڑے تینا جاری بیان اٹی او پارے کہ بھارت مقبوضہ دامان اٹی سفاکیت نا پوسکن ءُ لہر اسے نا بناءِ کرینے، اُرااُراٹی پٹنگ نا آڑاٹی کشمیری ورناتے شہید کننگ انگ ءِ۔ علی امین گنڈاپور پارے کہ مقبوضہ کشمیر اٹی ماورائے عدالت خون نا واقعہ غاتے ٹی خطرناک حد اسسکان ودکی مسنے، دنیا بھارت نا نسلی تعصب و ہندو انتہاپسندی نا ہم نوٹس ءِ ہلے۔ بھارتی ہندو انتہاپسندی خطرناک دنگ آتیا سرمسنے۔ علی امین گنڈاپور پارے کہ مسلم امہ ءِ مسلمان خاص وڑاٹ کشمیری و فلسطینی تا حق انا توار ءِ پبی وڑاٹ بڑزکروئی مریک۔ بھارت ءِ مسلمان و کشمیری تا برخلاف سفاکیت آن اسہ کنڈ کننگ کن جہانی پابندی خلنگے، بھارت ایل او سی آ اشتعال انگیزی ءِ پدریسہ تہو تننگ ءِ۔ علی امین گنڈاپور پارے کہ ہربھارتی مہم جوئی نا پبی ورندی ءِ تننگک۔ حق خودارادیت نا دوئی کننگ اسکان کشمیری تا پبی مخ تفی ءِ برجاتخنہ۔