اسلام آباد۔ 03 جون (اے پی پی) بنجائی وزیر مواصلات و پوسٹل مراد سعید پارینے کہ حکومت نا مثالی کارکڑدگی آن ملک انا آخبت بدل مننگ ءِ نن پاکستان پوسٹ ءِ چندی گام گیج آتا سوب آن پوسکن آ خواست آتون ہم گرنچ کرینن، 6 تُو آن پد غٹ پوسٹ آفس آک ڈیجیٹلائز مریرہ۔ وزیراعظم عمران خان نا وژن نا رداٹ لکھ آ ورناتے روزگار ملک۔ داخیال آتا درشانی ءِ او چارشنبے نادے آ داڑے پاکستان پوسٹ و حبیب بینک لمیٹڈ(ایچ بی ایل) نا نیام اٹ ڈیجیٹل فنانشل سروس نا بنانا معاہدہ غا دستخط نا دود آن تران کرسا کرے۔ دا وخت آ پاکستان پوسٹ و ایچ بی ایل نا کمامدارآک ہم ساڑی ئسر۔ دود آن تران کرسا بنجائی وزیر پارے کہ دا 20 سال آ تالان اسہ معاہدہ اسے۔ پاکستان پوسٹ و ایچ بی ایل نا پاکستان نا قومی ادارہ غاتیا الس نا پت بحال مسنے و ساڑی آ حکومت نا مثالی کارکڑدگی آن ملک انا آخبت بدل مننگ ءِ، پاکستان پوسٹ ہراتم ننے ملاسس تو مالی نسخان نا گواچی ئس ولے اینو دا ادارہ اسہ کٹیا کروک ءُ قومی ادارہ اسے نا دروشم اٹ مون آ ہِننگ ءِ۔ بنجائی وزیر مواصلات پارے کہ نن چندی اہم گام گیج آتا سوب آن دا قومی ادارہ ءِ پوسکن آ خواست آتون ہم گرنچ کرین، نن دا ادارہ غا الس ناپت ءِ بحال کرین۔ اوپارے کہ دوئی وسیلہ غاتے کاریم اٹ اتسا نن پاکستان پوسٹ ءِ شونداری نا سفر آ روان کرین، نن دا ادارہ ءِ ڈٛیجیٹل دور انا خواست آتون ہم گرنچ کننگ نا سفر نا کنڈآ درینن، 6 تُو آن پد کم و ود غٹ پوسٹ آفس آک ڈیجیٹلائز مریرہ۔ مراد سعید پاکستان پوسٹ اناملازم آتا ستاءِ کرسا پارے کہ کوویڈ۔ 19 نا سوب آن مچ آ ملک لاک ڈاؤن اٹی ئس ولے دا مشکل ساہت اٹی ہم پاکستان پوسٹ لکھ آ پنشنر آتے اُرانا درگہ غا پنشن نا زرتس ءِ پک کرے۔ اوپارے کہ پاکستان پوسٹ تینا صارف یا کسٹمر آتا آسراتی کن اسہ پلیٹ فارم اسے آ غٹ آسراتی تے تننگ کن سرگرم ءِ۔ دیجیٹل فرنچائز پوسٹ آفس آتا اڈتننگ آن اسہ کنڈآ دا ادارہ مالی وڑاٹ اسہ کٹیا کروک ادارہ اس مریک تو ایلو کنڈآ وزیراعظم عمران خان نا وژن نا رداٹ لکھ آ ورناتے روزگارملک۔ اومستی پارے کہ پاکستان پوسٹ نا کنڈآن اسہ لاجسٹک کمپنی اسےنا جوڑ کننگ نا مرحلہ بناکرینے و زوت پاکستان پوسٹ لاجسٹک نا پڑاٹ ہم گام ءِ تخک۔
