اسلام آباد۔ 22 فروری (اے پی پی) مسلم لیگ (ن) نا راہشون دانیال عزیز پارینے کہ عمران خان و جہانگیر ترین پاکستان نا تاریخ نا ہمواِرا سیاست دان ئُ ہرافک کرپشن نا اعتراف ئِ کرینو، عمران خان خیبر پختونخوا ٹی 120 دے اٹی احتساب کرسا نشان ایتے، وزیراعظم محمد نواز شریف نا پن پاناما پیپر اٹی اف، نن کاٹم ئِ شیف کرسا عدالت اٹی احتساب کن پیش مسونن۔ سپریم کورٹ نا پیشن میڈیا تون ہیت وگپ کرسا اوپارے کہ نیب انا چیئرمین ئِ بدل کننگ و برطرف کننگ نا اختیار نیشنل جج کمیشن تون ئِ، دانیال عزیز پارے کہ نیب آجوئُ ادارہ اسے و تینا وڑاٹ کاریم کننگ ئِ۔ اوپارے کہ عمران خان نا کنڈآن سپریم کورٹ اٹی پٹیشن آن مست گدرینگوک آ سال ستمبر اٹی لاہور ہائی کورٹ اٹی پاناما پیپرآ سماعت نا بناءکننگاسس و داٹی غٹ ادارہ غاک پیش مننگ ئُ و داوخت عمران خان قوم ئِ ورغلائفنگ ، دھرنہ، جلسہ و جلوس کننگ و لاک ڈاﺅن نا کوشست نا بنائِ کریسس ولے ہمووخت نا چیف جسٹس پاریسس کہ کمیشن اس اڈتننگے تو ہمووخت عمران خان پارے کہ آخا انتئے کہ او سیاست اٹی ایلو درگہ غان بننگ خوائسکہ۔ مسلم لیگ (ن) نا راہشون پارے کہ عمران خان خیبر پختونخوا ٹی احتساب کن جنرل (ر) حامد ئِ احتساب ادارہ نا سروک مقرر کننگا۔ ہراتم پی ٹی آئی لیڈرآتا پن بس تو جنرل حامد ئِ عہدہ غان اسہ پلو کرسا احتساب کانود اٹی ترمیم کننگا۔ اوعمران خان ئِ مخاطب کرسا پارے کہ داسہ سیاست اٹی پد انا درگہ غان پترینگ انگ نا کسر بند مسنے۔ نن عدالتی فیصلہ غاتا انتظار ئِ کینہ، انشاءاللہ سرسہب مرینہ و عمران خان ئِ ہلسا ہلسا مون آ اتینہ۔
