اسلام آباد۔ 22 فروری (اے پی پی) مسلم لیگ (ن) نا سینیٹر لیفٹیننٹ جنرل (ر) عبدالقیوم پارینے کہ مودی انتظامیہ پاکستان ئِ نزور کننگ خوائک نن دہشت گردی نا لعنت ئِ شکست ایتنہ۔ ریڈیو پاکستان تون ہیت وگپ کرسا اوپارے کہ اسہ سجفوک ئُ ڈٹ اسے نا رداٹ پاکستان آ نفسیاتی جنگ مسلط کننگ نا کوشست کننگ انگ ئِ، پاکستانی باہمت و زندہ ئُ قوم اسے و دہشت گردی نا برخلاف برجاجنگ اٹی پاکستانی قوم دنیا ٹی غٹ آن زیات جان تے قربان کرینو۔ اوپارے کہ دنیا نا ملک اسے ٹی دہشت گردی نا اسہ واقعہ اس مریک تو اونا اسٹاک ایکسچینج تولک۔ معیشت بھس مریک اللہ تعالیٰ نا شکر ئِ کہ پاکستان نا معیشت اٹی گچینی بننگ ئِ کاروبار چلینگ انگ ئِ، اسٹاک ایکسچینج نا انڈیکس اٹی عروج خننگ انگ ئِ و پیشن نا زرکارآک ہم پاکستان اٹی زرکاری کننگ ئُ و داہیت بھارت ئِ برداشت مفننگ ئِ۔ مودی و بھارتی اودیم ادارہ غاک پاکستان ئِ نزور کننگ کن اوغانستان نا گل زمین ئِ کاریم اٹ اتسا داڑے دہشت گردی کننگ ئُ۔ جنرل (ر) عبدالقیوم پارے کہ نن ہچ ئُ بہا اسے آ اودے اونا مسخت اٹی سرسہب مننگ کن الیپنہ۔ اوپارے کہ پاکستان اسہ پرامن ئُ ملک اس مرے و دنیا ٹی ہراڑے کہ بیدادی اس مریک اونا مذمت و علاقائی وت واجہی نا شرف ئِ کیک۔
