اسلام آباد۔ 21 فروری (اے پی پی) وزیر مملکت اطلاعات و نشریات وقومی میرات مریم اورنگزیب پارینے کہ دہشت گرد آتا ہچ ئُ مذہب اس اف، ننے یکجا مرسا اوفتا مقابلہ ئِ کروئی مریک، دہشت گردآتا لغور انگا واقعہ غاتیان نناعزم زیات سوگو و مستحکم مسنے۔ سے شنبے آ سپریم کورٹ نا پیشن میڈیا تون ہیت وگپ اٹی چارسدہ نا تحصیل تنگی نا کچہری نا خڑک خودکش جلہو نا ترندی اٹ مذمت ئِ کرسا اوپارے کہ نن جلہو اٹی تپاخت کروک آبندغ آتا خاہوت نا غم اٹی بریبر نا شریک اُن و دہشت گردی نا واقعہ غاتیٹی شہید و ٹھپی مروک آتا خاہوت تون سلوک اُن۔ وزیر مملکت پارے کہ دہشت گرد آک الس و سیکورٹی فورس آتا عزم ئِ نزور کننگ نا کوشست کریر ولے اوفتا غٹ لغورانگا جلہو بے سہب مس، دہشت گردی نا ساڑی واقعہ غاتیان سیکورٹی ادارہ و الس پین سوگو و حوصلہ مند مس۔ وزیراعظم نا سروکی ٹی بنجائی حکومت غٹ صوبائی حکومت ، پاکستان نا فوج ، کانود نافذ کروک آ ادارہ و مچ آ قوم آخریکو دہشت گرد نا چٹفنگ اسکان آرام اٹ تولپسہ۔ دہشت گرد آتا ہچ ئُ مذہب و ہچ ئُ دین اس اف۔ الس ئِ باوری ترفینہ کہ حکومت، پاکستان نا فوج و کانود نافذ کروک آ ادارہ غاک نمے مایوس مننگ کن الیپسہ، داوخت انا گرج ئِ کہ نن غٹ یکجا مرسا دہشت گرد آتا مقابلہ ئِ کین۔ پاکستان نا تہٹی ہراوخت اسکان اسہ دہشت گرد اس ساڑی ارے نن غٹ اسٹ مرسا اونا مقابلہ ئِ کینہ و انشاءاللہ نن سرسہب مرینہ۔
