وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ٹویٹ

اسلام آباد ۔ 30 جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعلیٰ جام کمال تون بلوچستان اٹی برجا شونداری ڈٹ آتیا گپ و تران وزیراعظم عمران خان نا بلوچستان نا جوڑ جاڑ، شونداری و شونہالی کن عزم انا پیدوار درشانی ءِ، بلوچستان نا الس نا احساس محرومی تے مر کینہ، اودے ملک انا ایلو شون ہلوک علاقہ غاتا بریبر اتنگ وزیراعظم عمران خان نا وژن ءِ ، بلوچستان نا شونداری پاکستان نا شونداری ءِ ۔ پنچ شنبے نادے آ تینا ٹویٹ اٹی ڈاکٹر فردوس عاشق اعوان پارے کہ رقبہ نا لحاظ اٹ غٹ آن بھلا صوبہ نا الس نا زند انا آب ءِ بڑز کننگ حکومت نا اولیت ءِ، اوفتے کن روزگار نا وارخواہی تا فراوانی و جان جوڑی و تعلیمی آسراتی تے پک کننگ تینا فرض تکک ۔ اوپارے کہ بلوچ الس ناشونہالی کن غٹ وسیلہ غاتے کاریم اٹ اتینہ ، وزیراعظم عمران خان السی ریلیف و 71سال آن مون تروک ویل آتا ایسری نا سوگو و پبی بنداو ءِ تخانے ۔ ڈاکٹر فردوس عاشق اعوان پارے کہ داکان مست اسہ حکومت اس ہم مشکل فیصلہ غاتا ہمت ءِ کننگ کتنے، مشکل فیصلہ عمران خان نا ملک و قوم اتون وابستہ مننگ نا شاہدی ءِ، وزیراعظم عمران خان مستین نا حکمران تیانبار شوبازی کننگ نا جاگہ غا قوم ءِ مصیبت آتا دلدل آن کشنگ نا فیصلہ ءِ کرے، وزیراعظم عمران خان نا جیرت مندانہ گام گیج آک بدلی اس اتیرہ ۔