وزیرداخلہ نا دورہ نیشنل پولیس اکیڈمی ، برجاشونداری و اپ گریڈیشن ڈٹ آتا معائنہ و زیرتربیت آفیسر آتیکن تیار ماڈل روم تا جاچ ءِ ہلک

اسلام آباد۔ 01اکتوبر (اے پی پی)بنجائی وزیر داخلہ محسن نقوی نیشنل پولیس اکیڈمی نا دورہ ءِ کرے ہراڑے او برجاشونداری و اپ گریڈیشن ڈٹ آتا معائنہ ءِ کرے و زیرِ تربیت آفیسر آتیکن تیار کروک آ ماڈل روم تا جاچ ءِ ہلک۔ دورہ نا وخت آ وزیر داخلہ نا کماشی ٹی بڑزکو کہول انا دیوان اس اڈ ہلک ہراٹی اکیڈمی ٹی برجاتعمیراتی و شونداری کاریم تیا پیش رفت نا سرجمی اٹ جاچ ءِ ہلنگا۔ بنجائی وزیر داخلہ اکیڈمی نا کانفرنس روم و آڈیٹوریم نا اول سرآن تفنگ نا پارت کرسا زور شاغا کہ غٹ ڈٹ آتے جوان ڈٹ بندی، بڑزکو آب و مقرر مروک آ وخت اٹی پورو کننگے۔ او پارے کہ وزیر مملکت داخلہ نیشنل پولیس اکیڈمی نا اپ گریڈیشن نا ڈٹ آتا ہڑدے ئی بنداو آ مانیٹرنگ ءِ کننگ اٹی ءِ۔ محسن نقوی پارت کرے کہ زیرِ تربیت آفیسر آتے سواٹ (SWAT) ٹیم تا وڑ انا پوسکن ہیلکاری ازباب فراوان کننگے تانکہ اوفتا عملی استعدادِ کار اٹی ودکی ممکن مننگ کے۔ او مڈ کیریئر مینجمنٹ کورس اکن ملک انا گچین و چاہندارفیکلٹی نا خذمت آتے ہلنگ نا پارت ہم جاری کرے۔ دیوان اٹی فیصلہ کننگا کہ ایم سی ایم سی نا نصاب اٹی پوسکن ڈیجیٹل پولیسنگ و مصنوعی ذہانت نا خصوصی ماڈیولز اوار کننگ نا سفارش کننگک۔ دا وخت آ ہیت و گپ کرسا بنجائی وزیر داخلہ پارے کہ پولیس آفیسر آتا تربیت ءِ ساڑی آ دور انا پوسکن آ خواست آتون ہم گرنچ کننگ فورس انا کسبی لائخی و جم آب ءِ گچین کننگ کن المی ءِ۔ دورہ و دیوان نا وخت آ کمانڈنٹ نیشنل پولیس اکیڈمی، کیپیٹل ڈویلپمنٹ اتھارٹی (سی ڈی اے) نا بڑزکو آفیسر و ایلو تعلقدار کمامدارآک ہم ساڑی ئسر۔