ڈی جی آئی ایس پی آر نا فاطمہ جناح ویمن یونیورسٹی راولپنڈی آبننگ، خوانوک آ مسن و فیکلٹی باسک آتون خصوصی نشست اس ، قومی امور و ڈیجیٹل چیلنج آتیا آجوئی اٹ گپ وتران

راولپنڈی۔ 01اکتوبر (اے پی پی)پاک فوج انا ترجمان لیفٹیننٹ جنرل احمد شریف چوہدری فاطمہ جناح ویمن یونیورسٹی راولپنڈی نا دورہ ءِ کرے، ہراڑے او خوانوک آ مسن و فیکلٹی باسک آتون اسہ سرجم وخصوصی انٹرایکٹو نشست اسے ٹی بشخ ہلک ۔ دا وخت آ ڈی جی آئی ایس پی آر قومی سلامتی، ڈیجیٹل میڈیا نا مون آ بروک چیلنج و ساڑی ملکی حالیت آتا بابت خوانوک آ مسن تا سوج آتا دلیل و سرجمی اٹ ورندی ءِ تس۔ دا براہِ راست سوج و ورندی نا سیشن بشخ ہلوک آتے قومی امور و دفاعی حکمتِ عملی نا بابت زمینی حقیقت آتے پہہ مننگ نا پبی موقع اس فراوان کرے، ہراڑآن سوشل میڈیا غاگشت کروک آ چندی ابہام، شک و شبہ و غلط گمانی مر مس ۔ نشست نا وخت آ فیکٹ چیکنگ، بیانیہ سازی و پوسکن آدور انا خواست آتیا جوان ہیت و گپ مس۔ دا وخت آ فاطمہ جناح ویمن یونیورسٹی نا وائس چانسلر پروفیسر ڈاکٹر بشریٰ مرزا تران کرسا پارے کہ تعلیم نا مسخت بیرہ ڈگری دوئی کننگ یا نصابی کتاب آتسکان بایدے محدود مف ، بلکن خوانوک آ مسن تا ہمہ جہت تربیت و اوفتے ڈغاری حقیقت و سچائی تیان معلومدار کننگ المی ءِ و اینو نا سیشن یقیناً دا اہم کڑد ءِ ادا کرینے، یونیورسٹی نا فیکلٹی باسک سارہ اختر ہاشمی، ڈاکٹر محمد علی و ثمید رضوان اکیڈیمیا و قومی ادارہ غاتا نیام اٹ دا وڑنا براہِ راست رابطہ غاتے وخت نا اہم گرج گوندار۔ او پاریرکہ ڈیجیٹل دور اٹ من گھڑت، بدنیتی آ تالان و گمراہ کن معلومداری نا گچین توننگ بھاز المی ءِ تانکہ معروضی حقیقت آک آجوئی اٹ مون آ بننگ کیر۔ او دا ہیت آ ہم زور شاغساپاریر کہ سوشل میڈیا نا بے پک خبرا آتیایخین کننگ نا جاگہ غا پوسکن آچین ءِ فیکٹ چیکنگ نا اصول آتے تینا کروئی مرے، نشست نا ایسر آ حاجرہ سلیم، وردہ احمد، ملائکہ قدیر و آمنہ ندیم تون اوار ایلو خوانوک آ مسنک تینا تاثرآتادرشانی ءِ کرسا پاریرکہ سلہہ بند فوج نئے بیرہ جغرافیائی سیم بلکن ڈیجیٹل دور اٹ غلط معلومداری نا برخلاف پڑتیاہم قوم انا گچین دفاع ءِ کننگ ءُ۔ خوانوک آ مسن تا پاننگ ئس کہ پوسکن آدور و خاص کر مصنوعی ذہانت نا کمک اٹ تالان کروک آ گمراہ کن مواد آتیان بچنگ کن معلومداری نا تصدیق مستند ذریعہ اٹ کننگ المی ءِ۔ خوانوک آ مسن و استاد آک ڈی جی آئی ایس پی آر نا بننگ و سرجمی اٹ گپ وتران نا منت واری ءِ ہرفساقومی ادارہ غاتون دا وڑنا فکری و معلومداری نشست آتا تسلسل ءِ برقرار تخنگ آ زور شاغار۔