بنجائی وزیر داخلہ نا عوامی جمہوریہ چین نا جوڑ مننگ نا 77 می سال دے انا وخت آ بڑزکو چینی سرکڑدہ و الس ءِ مبارکباد

اسلام آباد۔ 01اکتوبر (اے پی پی)بنجائی وزیر داخلہ محسن نقوی عوامی جمہوریہ چین نا جوڑ مننگ نا 77 می سال دے انا وخت آ بڑزکو چینی سرکڑدہ و الس ءِ مبارکباد ی پیش کرینے ۔ وزارت داخلہ نا کنڈآن جاری بیان نا رداٹ تینا خصوصی کلہو اٹ وزیر داخلہ چین نا صدر شی جن پنگ، وزیراعظم و تینا ہم منصب کن نیک است خواہی تادرشانی ءِ کرسا پارینے کہ اینو نا دے چینی قوم انا ثابت گامی و غیر معمولی جوزہ ءِ خراج تحسین پیش کننگ نا دے ءِ ۔ محسن نقوی پارے کہ صدر شی جن پنگ نا بصیرت افروز کماشی ٹی چین انسانی شونداری، سائنس و ٹیکنالوجی نا بشخ اٹ بے مثل سرسہبی دوئی کرینے، اونا زرگزرانی ، راجی و عسکری بشخ اٹ غیر معمولی شونداری نئے بیرہ ستاکڑزنگ نا قابل ءِ بلکن ڈیہہ انا امن، سوگوی و شونہالی نا اہم ذریعہ ہم ارے۔ او پاک چین تعلقداری تے مون آ تخسا پارینے کہ ہڑتوم آ ملک آک ہر موسم نا باپت شریدار ءُ و اوفتا تین پہ تینی سنگتی وخت انا ہر سخت انگا امتحان آ پورو سلیسنے ۔ اونا پاننگ ئس کہ ہمالیہ نا بڑزکو چوٹی ، سمندر نا کڑمبی وقراقرم نا سنگلاخ کسرآک دا لازوال رشتہ نا گواہ ءُ ، چین ہر تنکی ، علاقائی بے چیٹی و داخلی چیلنج اٹ پاکستان تون پبی کمک کرینے ۔ وزیر داخلہ قومی دے انا خوشی نا وخت آ چینی قوم انا سخت خواری ، بے مثال جدت پسندی و ولولہ انگیز عزم ءِ خراج تحسین پیش کرے۔