سندھ طاس معاہدہ ءِ اسہ کنڈی وڑٹ معطل، منسوخ یا بدل کننگ مفک، بھارت ءِ دیر ءِ سلہہ نا وڑٹ کاریم اٹ اتنگ نا موکل تننگپک، عطاء اللہ تارڑ

اسلام آباد۔ 30 ستمبر (اے پی پی)بنجائی وزیر حوالکاری و شینکاری عطاء اللہ تارڑ پارینے کہ سندھ طاس معاہدہ ءِ اسہ کنڈی وڑٹ معطل، منسوخ یا بدل کننگ مفک، دیر پاکستان نا 24 کروڑ الس نا بنداوی و امنا کروک حق ءِ، بھارت ءِ دیر ءِ سلہہ نا وڑٹ کاریم اٹ اتنگ نا موکل تننگپک، پاکستان جہانی کانود نا رداٹ تینا قومی مفاد آتا دفاع ءِ برجاء تخک، سندھ طاس معاہدہ نا حیثیت اٹ اسہ کنڈی بدلی نا گیشتر اثر آک مچ آ دنیا ٹی سرحد پار دِیرتا انتظام آ مرتب مننگ کیک، جہانی برادری ءِ دا باندات نا حساسیت نا درک ءِ کروئی مریک ۔ دا خیال آتا درشانی ءِ او چارشنبے نادے آ داڑے انسٹیٹیوٹ آف اسٹریٹجک اسٹڈیز اسلام آباد (آئی ایس ایس آئی) ٹی "دیر انا سلہہ نا وڑٹ کاریم اٹ اتنگ ، سندھ طاس معاہدہ نا معطلی نا تاریخی، کانودی و تذویراتی پلو” نا سرحال آ خصوصی رپورٹ نا رونمائی دود آن تران کرسا کرے۔ بنجائی وزیر پارے کہ نن تینا شناخت ءِ دریائے سندھ انا دیر تتون وابستہ تکنہ ، سندھ طاس معاہدہ نا وجوداٹی بننگ اِرا فریق آتا نیام اٹ دستخط نا وخت آ شاید دا گمان ءِ ہم کننگ پروءِ کہ منہ دہائی آن پد ہندن ءُ وخت اس ہم بریک ہراتم بھارت کانودی خواست آتیان بے خبر و اخلاقی قدر آتیان خورک مریک۔ او پارے کہ سندھ طاس معاہدہ شڑت و ضابطہ غاتا تعین کروک آکانودی فریم ورک ءِ و دستخط آن پد ہڑتوم فریق آتیا کانودی وڑٹ نافذ نا قابل و لازم ءِ۔ ہراتم معاہدہ ٹی دا شڑت ہم ساڑی مرے کہ اودے اسہ کنڈی وڑٹ منسوخ، ختم یا بدل کننگ مفک تو داڑآن پاکستان نا موقف ءِ کانودی سوگوی و جواز ملک ۔ عطاء اللہ تارڑ پارے کہ معاہدہ ءِ نئے تو اسہ کنڈی وڑٹ بدل، ختم یا منسوخ کننگ مریک و نئے اودے معطل کننگ مریک۔ جھیڑہ سے نا دروشم اٹ ہم ہڑتوم آ فریق آک معاہدہ نا شڑت و ضابطہ غاتیا عمل کننگ نا پابند ءُ۔ او پارے کہ اگست 2025 اٹی جہانی ثالثی عدالت پاکستان نا دا موقف ءِ کانودی جواز و سوگوی تس کہ معاہدہ نا حیثیت ءِ اسہ کنڈی وڑٹ بدل کننگ نا ہچ ءُ کوشست اس کننگ مفک۔ او پارے کہ حکومت پاکستان دا باندات ءِ سفارتی وڑٹ مون آ درے ، جہانی برادری تون رابطہ کرسا تینا کانودی و سفارتی موقف ءِ پیش کرے و اسہ ہندن ءُ ریاست اسے نا وڑٹ تینا مقدمہ ءِ پیش کرے ہرا ایلوتا حق آتا شرف ءِ کیک۔ بنجائی وزیر پارے کہ زوت آتے اٹ اقوام متحدہ نا جنرل اسمبلی نا 81 می دیوان اٹ وزیراعظم محمد شہباز شریف پارے کہ سندھ طاس معاہدہ پاکستان و ڈیہہ انا الس کن زند انا شہ رگ ءِ و دا حق ءِ غصب کننگ نا کوشست اسے جنگی گام اسے تکنگک۔ او پارے کہ سندھ طاس معاہدہ نا بابت پاکستان نا موقف اسُل پیدوارءِ۔دفترخارجہ و وزارتِ حوالکاری و شینکاری نئے بیرہ جہانی ادارہ بلکن ڈیہہ انا ملک آتون ہم رابطہ ٹی ء، انتئے کہ سندھ طاس معاہدہ ڈیہہ اٹی امن و استحکام نا ذریعہ ءِ ۔ عطاء اللہ تارڑ پارے کہ بھارت تینا غیر کانونی گام گیج آتا دفاع کن مبینہ سرحد پار دہشت گردی ءِ جواز نا وڑ اٹ پیش کیک، ولے پاکستان دہشت گردی نا برخلاف جنگ اٹ ہزار آ جان تا قربانی تسنے و خت اس کہ گدرینگوک آ چندی دہائی تیٹی پاکستان ءِ 150 ارب ڈالر آن زیات نا زرگزرانی نسخان آتون مون تروئی تمانے۔ او پارے کہ دہشت گردی نا برخلاف جنگ اٹ ہراتم پاکستانی اس تینا جان ءِ ندر کیک تو او بیرہ پاکستان نا رکھ اکن آخابلکن مچ آ دنیا ءِ زیات رکھ جوڑ کننگ کن مریک۔ او پارے کہ پاکستان دہشت گردی نا جنگ اٹ اولیکو صف نا کڑد ءِ ادا کننگ ءِ، وخت اس کہ ایلو کنڈآ بھارت ہرا سندھ طاس معاہدہ ءِ غیر کانونی وڑ اٹ معطل کننگ نا کوشست کرے ولے کینیڈا و ایلو ملک آتیٹی سکھ آتون اوار اقلیت آتا برخلاف ماورائے سرحد خونی کارروائی تا دوبہ ہم خلنگانے۔ بنجائی وزیر پارے کہ دیر ءِ سلہہ جوڑ کننگ و سندھ طاس معاہدہ نا بابت جھیڑہ ودی کننگ نا کوشست مذمت نا قابل ءِ و اودے کانونی، سفارتی یا اخلاقی کہول آ روا گوندنگ مفک۔ او پارے کہ سندھ طاس معاہدہ نا بابت پاکستان نا موقف ساف ءِ و چندی ملک آک پاکستان نا موقف نا تائید ءِ کرینو۔ ہر اتم کہ دا باندات جہانی کہول آ کانودی فورم تیا پیش مس، ہموڑے ہم پاکستان نا موقف ءِ سوگوی ملانے۔ عطاء اللہ تارڑ پارے کہ پاکستان اسے پرامن قوم اسے و امن تیا یخین تخک، ولے بھارت ءِ دیر ءِ سلہہ نا وڑاٹ کاریم اٹ اتنگ نا موکل تفک انتئے کہ دا پاکستان نا 24 کروڑ الس نا بنداوی و منوک ءُ حق اسے۔ او پارے کہ جہانی برادری دا باندات اٹ ساڑی گیشتر درور ءِ ہم بایدے مون آتخے۔ اگر ریاست اس متفقہ جھیڑہ غاتا ایسر نا وڑوڈول نا ساڑی گری آن پد ہم پابند جہانی آبی معاہدہ اسے اسہ کنڈی وڑ اٹ معطل کننگ کیک تو اونا اثر آک مچ آ دنیا ٹی سرحد پار دیر تا انتظام و بشخنگ نا نظام اسکان تالان مننگ کیک۔ اونا ہموملک آتیا ہم اثر مرتب مننگ کیک ہرافتا نیام اٹ دیر نا بشخنگ نا بابت معاہدہ غاک ساڑی ءُ، ہندا سوب آن انسٹیٹیوٹ آف اسٹریٹجک اسٹڈیز اسلام آباد نا کاریم اہم ءِ، پٹ وپولی ادارہ غاتا زمواری ءِ کہ او دا وڑنا پیش رفت نا تاریخی، کانودی و تذویراتی جاچ ءِ ہلساپالیسی ساز و جہانی برادری ءِ شاہدی تیا تالان جاچ اس فراوان کیر۔ بنجائی وزیر پارے کہ سندھ طاس معاہدہ نا بابت جاری کننگوک آ خصوصی رپورٹ دا شرہ ٹی اہم کڑد ادا کیک ہراٹی سندھ طاس معاہدہ نا تاریخ، بھارت نا فیصلہ غاتا کانودی پلو، بڑزکوعلاقہ غاتیٹی آبی انفراسٹرکچر نا بابت پیش رفت و پاکستان تون اوار مچ آ ڈیہہ آاوناتذویراتی اثر آتا جاچ ءِ ہلنگانے۔ عطاء اللہ تارڑ پارے کہ ثالثی عدالت اٹی بھارت ءِ ہرا سبکی تون مون تروئی تما، اودے کل خنار۔ بنجائی وزیر خصوصی رپورٹ جاری کننگ آانسٹیٹیوٹ آف اسٹریٹجک اسٹڈیز اسلام آباد نا منت واری ءِ ہرفساپارے کہ حکومت دا مسخت کن ادارہ غاتون پدریسہ کاریم کننگ نا خواہندار ءِ  ۔