وزیراعظم نا تنخواہ ٹی ودکی نا خبر نا تردید، داوڑانگا سٹی و خودگڑ آ خبر آتا تالان کننگ است ہسونی نا سوب ءِ ، ترجمان وزیراعظم

اسلام آباد ۔ 30 جنوری (اے پی پی) ترجمان وزیر اعظم آفس ، وزیراعظم نا تنخواہ ٹی ودکی نا خبر نا سختی اٹ تردید ءِ کرسا پارینے کہ اسہ ہندن ءُ وخت اسے ٹی ہراکہ وزیراعظم نئے بیرہ ہر ممکنہ وڑاٹ حکومت نا خڑچ آتے ٹی کمتی اتنگ نا مہم اس چلیفنگ ءِ و ہرانا بناءِ او تینا جند آن کرے داوڑانگا سٹی و خود گڑ خبر آتا تالان کننگ بے کچ است ہسونی نا سوب ءِ ۔ پنچ شنبے نادے آ وزیراعظم میڈیا آفس آن جاری بیان نا رداٹ ترجمان پارے کہ وزیراعظم نا پارت آ کابینہ نا ساڑی آ دیوان اٹی صدر و وزیراعظم نا تنخواہ و مراعات آتے ٹی ترمیم کرسا دا فیصلہ کننگاکہ داسہ صدر و وزیراعظم کن بیرہ اسہ رہائش گاہ ءِ کیمپ آفس نا درجہ تننگ مریک ۔ کابینہ نا دیوان اٹی وزیراعظم پیدوار پارت کرے کہ مستین نا روش نا جاگہ غا کیمپ آفس آتے ٹی مروک آ خڑچ آتا ہم اسہ حد اس مقرر کننگے ۔ وزیراعظم پارے کہ سروک حکومت آ چست کروک آ خڑچ آتے الس نا خواری نا کٹیا غان پورو کننگک ہنداخاطران کوشست کننگے کہ دا خڑچ آک کم آن کم مریر ۔