سیکشن 8 اے انا رداٹ وزیراعظم نا پارت آ صدر مملکت مسہ سال اکن جنرل رینک انا آفیسر نا بطور چیف آف آرمی اسٹاف و چیئرمین جوائنٹ چیفس آف اسٹاف کمیٹی تقرری ءِ کننگ کیک
اسلام آباد ۔ 03جنوری (اے پی پی) آرمی ایکٹ (ترمیمی) بل 2020ء ءِ قومی اسمبلی ٹی پیش کننگا ہرانارداٹ صدر مملکت وزیراعظم نا ایڈوائس آ آرمی چیف و چیئرمین جوائنٹ چیفس آف سٹاف کمیٹی نا بروک آ مسہ سال اکن دُوارہ تقرری ءِ کننگ کیک ۔ جمعہ نادے آ قومی اسمبلی ٹی وزیر دفاع پرویز خٹک آرمی ایکٹ (ترمیمی) بل 2020ء ءِ پیش کرے ۔ پیش کروک بل انا رداٹ آرمی ایکٹ 1952ء نا شق 176اے اٹی ترمیم پیش کننگانے ۔ آرمی ایکٹ نا سیکشن 8 اے انا رداٹ وزیراعظم نا ایڈوائس آ صدر مملکت مسہ سال اکن جنرل رینک انا آفیسر نا بطور چیف آف آرمی اسٹاف و چیئرمین جوائنٹ چیفس آف اسٹاف کمیٹی تقرری ءِ کننگ کیک ۔ بل انا رداٹ شق 8 بی انا رداٹ تعینات آرمی چیف انا دُوارہ تقرری نا وڑوڈول اس جوڑ کننگانے ہرانا رداٹ قومی سلامتی نا فائدہ غاتا رکھ اکن وزیراعظم پاکستان نا ایڈوائس آ صدر مملکت پین مسہ سال اکن چیف آف آرمی اسٹاف نا تقرر یا اونا عہدہ نا معیاد اٹی ودکی کننگ کیک ۔ بل انا رداٹ چیف آف آرمی اسٹاف نا تقرری یا اونا عہدہ نا مدت اٹی ودکی ءِ اسہ عدالت اسے ٹی ہم چیلنج کننگ مفک ۔ بل انا شق 8 سی انا رداٹ آرمی چیف نا عہدہ نا ریٹائرمنٹ و ملازمت نا دنگ انا تعین ءِ کننگانے ۔ دا شق انا رداٹ ریٹائرمنٹ نا وئی و جنرل اسے نا ملازمت نا مد انا شڑت و محدودات آتا تعین چیف آف آرمی اسٹاف یا آرمی چیف نا عہدہ ٹی ودکی نا رداٹ مفک بشرطیکہ اونا وئی 46 سال آن زیات مرے ۔ ترمیمی بل انا شق 8 بی اٹی چیئرمین جوائنٹ چیفس آف اسٹاف کمیٹی نا تقرری نا وڑوڈول ءِ طے کننگانے ۔ دانا رداٹ صدر مملکت وزیراعظم پاکستان نا ایڈوائس آ پاکستان آرمی نا جرنیل ، پاکستان نیوی نا ایڈمرلز یا پاکستان ایئر فورس نا ایئر چیف مارشل آن اسٹ اسے نا مسہ سال نا مد اکن تقرر ءِ کننگ کیک ۔
