باکو۔9جولائی (اے پی پی): راجی اسمبلی ءِ اسپیکر سردار ایاز صادق ءِ سروکی ءَ پارلیمانی ڈل ءَ باکو ءَ آذربائیجان ءِ مزن وزیر علی اسدوف ءَ گوں گند ءُ نند کت۔ چار شمبے ءِ روچ ءَ راجی اسمبلی سیکرٹریٹ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ اسپیکر سردار ایاز صادق ءَ صدر الہام علیوف ءُ اسپیکر بانک غفارووا ءِ گوما گوستگیں گند ءُ نند ءَ را جوانیں ءُ جوڑیشت لیک اتگ۔ اسپیکر سردار ایاز صادق ءَ آذربائیجان ءِ مزن وزیر ءَ را ایکو سروک دیوان ءِ سوبمندیں برجم دارگ ءِ پد ءَ مبارکی دات۔ راجی اسمبلی ءِ اسپیکر سردار ایاز صادق ءَ گوشت کہ ایکو سروک دیوان ءَ مزن وزیر شہباز شریف ءِ بھر زوری دوئیں ملک آنی نیام ءَ یکوئی ءُ نیک راھی ءِ علامت انت۔ آئی ءَ کشمیر ءِ جیڈھ ءِ سر ءَ پاکستان ءِ موقف ءِ سر ءَ بے مٹیں کمک ءِ سر ءَ آذربائیجان ءِ منت واری ءِ درشان کت ءُ آذربائیجان ءِ نیمگ ءَ پاکستان ءَ 2ارب ڈالر ءِ سرمایہ کاری ءِ جار ءَ را وش اتک کت۔ راجی اسمبلی ءِ صدر ءَ دوئیں براتیں ملک آنی پارلیمنٹ آنی نیام ءَ رابطہ آناں دیمروئی دیگ ءِ ضلورت ءِ سر ءَ زور پر دیان ءَ اے سال ءِ ستمبر ءَ اسلام آباد ءَ سئے نیمگی اسپیکر کانفرنس ءِ میزبانی ءِ تجویز داتگ۔ گند ءُ نند ءِ ساھت ءَ آذربائیجان ءِ مزن وزیر علی اسدوف ءَ کشمیر ءِ ھوالگ ءَ آذربائیجان ءِ اصولی موقف ءِ پدا زور دات ءُ ناگورنو کراباخ ءِ جیڈھ ءِ ھوالگ ءَ پاکستان ءِ کمک ءِ سر ءَ منت گپت۔ مزن وزیر علی اسدوف ءَ گوشت کہ آذربائیجان وتی حاکمیت ءُ سرزمین ءِ یکوئی ءِ سر ءَ ھچ وڑیں سمجھوتہ نہ کنت۔ گند ءُ نند ءَ دوئیں ملک آنی نیام ءَ ترجیحی تجارتی معاہدہ ءِ سر ءَ عمل کنگ ءَ را وش اتک کنگ بوت۔
