مزن وزیر محمد شہباز شریف ءَ ترکی ءِ دری کارانی وزیر ہاکان فیدان ءُ راجی دفاع ءِ وزیر یاسر گلر ءَ گوں گند ءُ نند کتگ، پاک ءُ ترکی ءِ سیادی ءَ را اسٹریٹجک شریکداری ءِ تہ ءَ بدل کنگ ءِ مھکمیں جزم ءِ درشان

اسلام آباد۔9جولائی (اے پی پی): مزن وزیر محمد شہباز شریف ءَ پاک ترکی ءِ دو نیمگی سیادی آنی تہ ءَ جوانیں پیشرفت ءِ سر ءَ دل یکیمی ءِ درشانی کنان ءَ پاکستان ءِ پکوئیں جزم ءِ درشان کنان ءَ ترکی ءِ گوما تجارت، سرمایہ کاری، ٹیکنالوجی ءُ دفاع ءَ ھوار جتا جتائیں پڑ آنی تہ ءَ کمک ءَ را گیش مھکم کنگ ءُ آئی ءَ را اسٹریٹجک شریکداری ءِ رنگ ءَ بدل کنگ ءِ پاکستان ءِ مھکمیں جزم ءِ سر ءَ زور پر دات۔ آئی ءَ دمگی ءُ جھان ءِ ترندی ءَ گوں بدل بوھوکیں چاگرد ھاسیں رنگ ءَ غزہ ءُ ایران ءِ رد ءَ دوئیں نیمگ آنی نیام ءَ نزیکیں سیادی ءِ ضلورت ءِ سر ءَ زور پر دات۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ گوں ترکی ءِ درئی کارانی وزیر ہاکان فیدان ءُ راجی دفاع ءِ وزیر یاسر گلر ءَ گند ءُ نند کتگ۔ گند ءُ نند ءَ نائب مزن وزیر ءُ دری کارانی وزیر سینیٹر محمد اسحاق ڈار، چیف آف آرمی سٹاف فیلڈ مارشل سید عاصم منیر، وزیر دفاع خواجہ محمد آصف، قومی سلامتی ءِ مشیر لیفٹیننٹ جنرل محمد عاصم ملک ءُ اے دگہ مزنیں کارندہ ھم ھوار اتنت۔ مزن وزیر ءَ ترک ڈل ءَ را وش اتک کنان ءَ پاکستان ءُ ترکی ءِ نیام ءَ دیریں براتی سیادی ءِ ذکر کت کہ ایشی ءِ بنیات یکجائی راجدپتر ، دود ءُ ربیدگ ءُ وت مہ وتی شرپ ءُ شرپ ءِ سر ءَ انت۔ آئی ءَ دو نیمگی سیادی آنی جوانیں دیمروئی ءِ سر ءَ دل یکیمی ءِ درشان کت ءُ تجارت، سرمایہ کاری، ٹیکنالوجی ءُ دفاع ءَ ھوار جتا جتائیں شوبگ آنی تہ ءَ ترکی ءِ گوما کمک ءَ را گیش مھکم کنگ ءِ واستہ پاکستان ءِ بے دروریں جزم ءِ سر ءَ زور پر دات۔ مزن وزیر ءَ اے سال ءَ ترکی ءِ صدر رجب طیب اردوان ءِ گوما وتی جتا جتائیں گند ءُ نند آنی یات ءَ کنان ءَ 17می ایکو سروک دیوان ءِ ساھت ءَ گوستگیں گند ءُ نند ءِ یات ءَ کنان ءَ پاک ترکی ءِ سیادی ءَ را اسٹریٹجک شریکداری ءِ تہ ءَ بدل کنگ ءِ واستہ پاکستان ءِ مھکمیں جزم ءِ سر ءَ پدا زور پر دات۔ نائب مزن وزیر ءُ درئی کار ءِ وزیر سینیٹر محمد اسحاق ڈار ءُ دری کارانی وزیر ہاکان فیدان ءِ یکجائی سروکی ءَ یکجائی کمیشن ءِ دیوان ءِ گوانک ءِ وش اتک کنان ءَ مزن وزیر ءَ امیت سہرا کت کہ دوئیں ملک آنی نیام ءَ دو نیمگی سیادی گیش گہتر بنت، ایشی ءَ چہ کثیر جہت ءِ دمگ ءَ کمک ءَ را مھکم کنگ بیت۔ مزن وزیر ءَ اے گپ ءِ پدر کنگ ءَ کہ دوئیں ملک یکے دومی ءِ بنیاتی مفاد آنی واستہ وتی مھکمیں ءُ بے مٹیں کمک ءَ را برجاہ دار اَنت، ھاسیں رنگ ءَ غزہ ءُ ایران ءِ رد ءَ ترندی ءَ گوں بدل بوھوکیں دمگی ءُ جھان ءِ چاگرد ءَ دوئیں نیمگ آنی نیام ءَ نزیکیں ھوار بوھگ ءِ ضلورت ءِ سر ءَ زور پر دات۔ آئی ءَ یک رندے پدا ھندوستان ءِ گوما گوستگیں جیڈھ ءِ وھد ءَ پاکستان ءِ برجاھیں کمک ءِ سر ءَ ترک راج ءُ سروکی ءِ دل ءِ جہلانکی ءَ چہ منت واری ءِ درشان کت۔ مزن وزیر ءَ 5ارب ڈالر ءِ وت مہ وتی تپاکی ءِ ٹارگٹ ءِ سر ءَ سر بوھگ ءِ واستہ دو نیمگی تجارت ءَ را گیش کنگ ءِ واستہ دوئیں ملک آنی نیمگ ءَ یکجائی کوشست آنی ضلورت ءِ سر ءَ زور پر دات۔ آئی ءَ پاکستان ءِ سرمایہ کار دوستیں پالیشی آنی سر ءَ چمشانک دیان ءَ ترک کمپنی آناں پاکستان ءَ وتی سرمایہ کاری ءَ را گیش کنگ ءِ دعوت دات ءُ ترکی ءَ را پاکستان ءِ ڈھانچہ ءِ اصلاحات ءُ اقتصادی دیمروئی ءِ تہ ءَ شریک بوھگ ءِ دعوت دات۔
مزن وزیر محمد شہباز شریف ءَ ترکی ءِ دری کارانی وزیر ہاکان فیدان ءُ راجی دفاع ءِ وزیر یاسر گلر ءَ گوں گند ءُ نند کتگ، پاک ءُ ترکی ءِ سیادی ءَ را اسٹریٹجک شریکداری ءِ تہ ءَ بدل کنگ ءِ مھکمیں جزم ءِ درشان