سرینگر ۔ 03 جنوری (اے پی پی) مقبوضہ کشمیر اٹی پدریسہ 152می دے آ ہم بھارتی فوجی گھیڑ برجاءِ ہرانا سوب آن دامان کشمیر و جموں و لداخ نا مسلم اکثریتی علاقہ غاتے ٹی بے پک حالیت آک پدریسہ برجاءُ ۔ کشمیر میڈیا سروس نا رداٹ تدوک آ سال پنچ اگست آن دفعہ 144 نا رداٹ پابندی نافذ وخت اس کہ بھلو کچ اسے ٹی بھارتی فوجی و پولیس کارندہ غاک عینات ءُ ۔ پری پیڈ موبائل فون و انٹرنیٹ سروس ہم بند ءِ ، ہرانا سوب خلقت خاص وڑاٹ طالب علم، صحافی و پوریا گر برادری ءِ سخت مشکل آتا مون تروک ءِ ۔ نریندر مودی نا کماشی ٹی جوڑ بھارتی جنتا پارٹی نا فرقہ پرست بھارتی حکومت تدوک آ سال پنچ اگست آ آئین نا دفعہ 370 و -35اے ءِ منسوخ کرسا مقبوضہ کشمیر نا خصوصی حیثیت ءِ چٹفیسس و اودے بنجا نا بست و بند اِرا جتا علاقہ جموں و کشمیر و لداخ اٹی بشخاسس ۔ کشمیری الس بھارت نا دا غیر کانودی و اسہ کنڈی گام انا برخلاف بطور برانز سول نافرمانی نا تحریک ءِ برجاتخانو ۔ داکان بیدس بھارتی کوزہ گر انتظامیہ مقبوضہ کشمیر نا مسکوہی وزیراعلیٰ محبوبہ مفتی نا مسڑ التجا مفتی ءِ تدوک آ دے سری نگر اٹی اونا اُراٹی نظر بند کریر ۔ التجا مفتی نارداٹ او انتظامیہ غان تینا پیرہ مفتی محمد سعید نا قبر آ حاضری نا موکل خواہسوسس ولے موکل تننگ نا جاگہ غا اودے اُراٹی نظر بند کننگا ۔ مفتی محمد سید ہم اِرا وار مقبوضہ کشمیر نا وزیراعلیٰ رہینگانے ۔
