بیجنگ ءَ۔ 9جولائی (اے پی پی): وفاقی وزیر اھوالکاری ءُ شنگکاری عطا اللہ تراڑ بیجنگ ءَ سر بوتگ تانکہ جھان ءِ تہذیب آنی گپ ءُُ تران ءِ ھوالگ ءَ وزارتی دیوان ءَ بھر زوری بوتگ۔ اے دیوان 10 ءُ 11 جولائی ءَ چین ءِ کمیونسٹ پارٹی ءِ مرکزی کمیٹی ءِ پبلسٹی ءُ انٹرنیشنل ڈیپارٹمنٹ ءُ چین ءِ درئی کارانی وزارت ءِ کمک ءَ کنگ بوھگ ءَ اِنت۔ جہانی تہذیب آنی گپ ءُ تران چین ءِ صدر شی جن پنگ ءِ وژن ءِ رد ءَ جہانی تہذیب آنی گامگیج ءِ بھر اِنت۔ وفاقی وزیر ءِ اھوالکاری عطا اللہ تراڑ ھم ’’تہذیب ءِ تبادلہ ءُُ وت مہ وتی وانگ ءُُ دود ءُُ ربیدگ ءِ ورثہ ءُُ نوآبادیاتی‘‘ ءِ بنگپ ءِ سر ءَ سب فورم ءِ تہ ءَ کلیدی گشتانک دنت۔ گپ ءُ تران ءِ تہ ءَ وفاقی وزیر ءِ اطلاعات ءِ بھر زوری دود ءُ ربیدگ، میڈیا ءُ نوآبادیاتی ءِ پڑ ءَ جتا جتائیں تہذیب آنی نیام ءَ گپ ءُ تران ءُ کمک ءِ دیمروئی ءِ ارزشت ءِ یک ھاسیں درشان اِنت۔ وتی تر ءُُ تاب ءِ ساھت ءَ وفاقی وزیر ءِ اھوالکاری ءَ سی پیک ءِ مرکزی کمیٹی ءِ پبلسٹی ڈیپارٹمنٹ ءِ ڈپٹی سروک، چین ءِ راجی ریڈیو ءُ ٹیلی ویژن انتظامیہ ءِ پارٹی سیکرٹری ءُ وزیر کاؤ شومین ءَ گوں ھم گند ءُ نند کنت، ایشی ءِ تہ ءَ پاکستان ءُُ چین ءِ نیام ءَ میڈیا کمک ءَ را گیش دیمروئی دیگ ءِ ھوالگ ءَ گپ ءُُ تران کنگ بیت۔ ایشی ءَ ابید دود ءُ ربیدگی تبادلہ ءُ وت مہ وتی ءِ ھاتر ءَ نوکیں موہ آنی شوھازگ ءِ سر ءَ ھم گپ ءُ تران کنگ بیت۔ مزن تک ءِ مراگش ءَ وفاقی وزیر ءِ اھوالکاری ءِ بھر زوری چین ءُ پاکستان ءِ سروکی ءُ الس ءِ نیام ءَ مھکمیں سیادی ءُ دوئیں ملک آنی نیام ءَ تہذیبی گپ ءُ تران ءِ دیمروئی ءِ یکجائی وژن ءِ درشان اِنت۔ اے موہ ءِ سر ءَ وفاقی وزیر ءِ اھوالکاری ءَ گوشت کہ تہذیب آنی نیام ءَ گپ ءُُ تران جھان ءِ ھمگرنچی، امن ءُ دیمروئی ءِ بُن ھشت اِنت، پاکستان اے عمل ءِ تہ وتی سرگرمیں کرد ءَ برجاہ دار ایت۔ آئی ءَ گوشت کہ پاکستان ءُ چین ءِ نیام ءَ میڈیا ءُ دود ءُ ربیدگی کمک دوئیں ملک آنی الس ءَ را نزیک کنگ ءِ وسیلگ جوڑ بوھگ ءَ انت۔ وفاقی وزیر ءَ گوشت کہ اے گند ءُُ نند سرجمیں دگنیا ءَ تہذیب آنی نیام ءَ وت مہ وتی احترام ءُُ وانگ ءُُ زانگ ءِ جذبہ ءَ را گیش کنگ ءِ واستہ یک انچیں موہ ءِ انت۔
