وفاقی وزیر منصوبہ بندی ءُ دیمروئی احسن اقبال ’’اُڑان پاکستان اوورسیز سمر انٹرنشپ اسکالر پروگرام“ ءِ بنگیج ءِ مراگش ءَ گوں تران

اسلام آباد۔9جولائی (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ چار شمبے ءِ روچ ءَ ’’اُڑان پاکستان اوورسیز سمر انٹرنشپ اسکالر پروگرام‘‘ ءِ بنگیج ءِ مراگش ءَ گوں تران کنان ءَ گوشت کہ اے پروگرام مزن وزیر ءِ پرچم بردار منصوبگ ءِ یک ھاسیں بھرے کہ ایشی ءِ تہ ءَ پاکستان ءِ نودربر آناں ’’موازنہ کنگ‘‘ ءِ مول ءُ مراد ھوار اِنت۔ راجی دیمروئی ءِ عمل ءَ را دیم ءَ برگ ءُ سرکاری ادارگ آنی تہ ءَ عملی تجربہ ءِ دیم ءَ آرگ ءَ انت۔ وفاقی وزیر ءَ گوشت کہ اے اولی رند اِنت کہ پاکستان حکومت ءِ نیمگ ءَ درملک ءَ وانگ ءَ پاکستانی نودربر آنی واستہ سرکاری تک ءَ انٹرنشپ پروگرام ءِ برجم دارگ بوتگ ایشی ءَ چہ اوورسیز پاکستانی آنی حکومت ءِ سر ءَ بھروسہ ءِ درشانی کنگ بیت۔ احسن اقبال ءَ گوشت کہ اے پروگرام مزن وزیر شہباز شریف ءِ ویژن ءِ رد ءَ وزارت ءِ منصوبگ بندی ءِ نیمگ ءَ جوڑ کنگ بوتگ۔ اے پروگرام ءِ چیر دستی ءَ دگنیا ءِ نامداریں یونیورسٹی آنی تہ ءَ چہ گچین بوتگیں 31 نودربر پلاننگ کمیشن ءِ توانائی، بنیاتی ڈھانچگ، برآمدات، ای پاکستان، ءُ چاگردی رکھینگ ءُ وردن ءِ وڑیں کلیدی شوبگ آنی تہ ءَ کار کن اَنت۔ وفاقی وزیر ءَ درشان کت کہ اے شوبگ ”اُدان پاکستان“ ءِ پنچیں ستون (Five A’s) ءِ نمائندگی کن اَنت ءُ انٹرنشپ ایوک ءَ فائل ءِ کار یا انتظامی جیڈھ آنی تہ ءَ ھوار نہ بیت بلکیں نودربر آناں وتی شوبگ آنی ھوالگ ءَ عملی منصوبگ آنی تہ ءَ ھوار کنت۔ اے پروگرام ءِ ھاتر ءَ دنیا ءِ 45 ءَ چہ گیش ملکاں چہ 2300 ءَ چہ گیش درخواست رستگ ات کہ ایشی ءِ تہ ءَ 31 نودربر سکیں میرٹ ءِ بنیاد ءَ گچین کنگ بوتگ ات۔ احسن اقبال ءَ اے پروگرام ءَ را ایوک ءَ اسکالرشپ نہ بلکیں یک راجی تحریکے لیک اِتگ کہ آ وانگ ءُ زانگ، رھشونی ءُ شوق ءَ گوں دیمروئی ءَ ھمگرنچ کنت۔ آئی ءَ گوشت کہ پاکستان ءِ 60درسد ءَ چہ گیش آبادی ورنا آں چہ جوڑ بوتگ، آ ملک ءِ ارزشتی ایں اسٹریٹجک اثاثہ اَنت۔ اگاں ما اے اثاثہ ءَ متحرک نہ کنیں گڑا اے ضائع بیت۔ احسن اقبال ءَ گوشت کہ ’’اُدان پاکستان‘‘ پنچ سالی راجی اقتصادی بدلی منصوبگ اِنت کہ یک ملین ورنا آنی توانائی، ھیال ءُ واھشت آناں کارمرد کنگ ءِ جزم ءِ گوما بندات کنگ بوھگ ءَ اِنت۔ اے ورنا پاکستان ءِ نظام ءَ گوں نزیکی ءَ گند اَنت ءُ دیمروی ءِ عمل ءِ بہر جوڑ بنت۔ وفاقی وزیر ءَ مراگش ءِ موہ ءَ اقتصادی استحکام ءِ انوگیں سوبمندی آنی ھم ذکر کت۔ آئی ءَ گوشت کہ اپریل 2022 ءَ وھدے استیں حکومت ءَ اقتدار گپت گڈا پاکستان دیوالیہ بوھگ ءِ کش ءَ ات ءُ وزارت خزانہ دیمروئی بجٹ ءِ فنڈز ءَ را ریلیز کنگ ءَ بے سوب ات۔ اے نازرکیں وھد ءَ سرکار ءَ سخت ءُ ناپسندیں پیسلہ کتگ ات کہ ایشی ءِ تہا پٹرولیم ءِ چیزانی نرخانی تہا مزنیں کساسے ءَ گیشی ھوار ات۔ آئی ءَ گوشت کہ الس ءَ صبر ءُ اوپار ءِ گوما اے پیسلہ برداشت کتگ اَنت ءُ مرچی ھمے پیسلہ ملک ءِ اقتصادی برجائی ءِ بنیات جوڑ بوتگ اَنت ۔ مہنگائی 38درسد ءَ چہ 4درسد ءَ اتکگ، اسٹاک مارکیٹ انڈیکس 40 ہزار ءَ چہ 130ہزار ءَ سر بوتگ ءُ عالمی سرمایہ کار آنی اعتماد بحال بوتگ۔ ایشی ءِ ھمراھی ءَ پاکستان ءِ جھان ءِ تک ءَ انزوا ھلاس بوتگ ءُ ھاسیں ملکانی گوما سیادی پدا مھکم کنگ بوھگ ءَ اِنت۔ احسن اقبال ءَ گوشت کہ ’’اُڑان پاکستان ” ءِ اے ورنا راجی دیمروئی ءِ آرکیٹیکٹ ءُ ورنا سفیر اَنت، آ وتی ملک ءَ واتر کن اَنت ءُ یک رژنائیں پاکستان ءِ جوڑ کنگ ءَ وتی کرد ءَ پیلو کن اَنت۔