لوک سبھا نا کانود جوڑ کننگ پاکستان و بھارت نا نیام اٹ چندی ہڑتوم آ کنڈآتا معاہدہ خاص وڑاٹ اقلیت آتا حق و سلامتی نا بابت معاہدہ نا اسُل خلا ف ورزی ءِ، دفتر خارجہ
اسلام آباد۔ 10 دسمبر (اے پی پی) پاکستان بھارتی لوک سبھا ٹی پرخ و تعصبی کانود جوڑ کننگ نا ترندی اٹ مذمت ءِ کرینے، پاکستان و سویلی ایشیا نا ایلو ملک آتا غیرمسلم باتی و پردیسی تے بھارتی شہریت تننگ نا بابت بھارتی لوک سبھاٹی ساڑی کانودی جوڑ کننگ دروغ و درو آ مبنی ءِ و دا گام انسانی حق انا جہانی منشور و ہر وڑنا پرخ، مذہب یا عقیدہ نا بنداو آ ہر وڑنا تعصب آتا چٹفنگ کن جہانی معاہدہ غاتا پاش آن پاش خلاف ورزی ءِ، لوک سبھا نا کانود جوڑ کننگ پاکستان و بھارت نا نیام اٹ چندی ہڑتوم آ کنڈآتا معاہدہ خاص وڑاٹ ہڑتوم آ ملک آتا اقلیت آتا حق و سلامتی نا بابت معاہدہ نا ہم اسُل خلا ف ورزی ءِ۔ دفترخارجہ نا کنڈآن جاری بیان نا رداٹ دا کانود جوڑ کننگ ’ہندو راشٹرا‘ نا گمان ءِ عملی دروشم اس تننگ نا کنڈا اسہ پین بھلو گام اسے۔ دا گمان نا تعبیر کن راستیکو دُو انا ہندو راہشون کیہی سال آتیان سرگرم عمل ءُ۔ دا ”ہندتوا“ نا انتہاپسندانہ سوچ و ڈیہہ ٹی کوزہ گیری پسندانہ خیال آتا زیاری ءُ اواری اسے۔ دا مذہب نا بنداو آ ہمسایہ ملک آتا تہہ نا باندات آتے ٹی نیام تمنگ نا پیدوار درشانی ءِ ہرادے نن ہروڑاٹ مسترد کینہ۔ بھارت نا کنڈآن تینے ہمسایہ ملک آتے ٹی زیزاریفوک آ اقلیت آتا اُراپاش کننگ نا دعویٰ ہم بے کچ مذمت نا قابل ءِ۔ گجرات اٹی ہزار آ مسلمان تا لس خون، سمجھوتہ ایکسپریس نا سانحہ، میئی تا محافظ جتھ آتا دوٹی بے کچ خلقت نا خون، اُراغا پدی و ”جہاد تون پیار“ نا پن اٹ بناکروک آ بدنام زمانہ اسکیم تیان بیدس مسیح، سکھ، جین و دلت کون آ شیفکو ذات انا ہندو تیا بہیمانہ بیداد، انتہاپسند ہندو نظریہ تخوک آ حکمران تپہ نا اعزاز و درستی راستی ءِ، ہشتاد لکھ بے گناہ و کودک کشمیری تیا ظلم و جور برجاءِ، نہہ لکھ آن زیات بھارتی کوزہ گیر فوج اوفتیا ظلم انا زی آ ظلم کننگ ءِ، داغٹ راستکیک انتہاپسندبھارتی سُج انا پورو وڑاٹ تشریخ و درستی راستی ءِ پیش کیک۔ بھارتی کانود جوڑ کننگ اسہ وار ولدا بھارتی ’جمہوریت‘ و ’سیکولرازم‘ نا خورک دعویٰ تے بے نقاب کرینے۔ گیشتری نا ایجنڈا ءِ مون آ درسا آر ایس ایس و بی جے پی نا ایلو عقیدہ نا خلقت ءِ کشوک و پیشن خسوک سوچ مچ آ دنیا نا مون آ بسنے و مسلمان تیان بھاز خار ہرادرجہ غاٹے۔ دانا ہم پیدوار درشانی مسنے۔ نن دا پرخ، جارحانہ و جابرانہ کانود سازی نا مذمت ءِ کینہ ہرا غٹ تعلقدار جہانی ضابطہ و قدر انا اسُل خلاف ورزی ءِ و ہمسایہ ملک آتے ٹی بھارتی نیام تمنگ و بدنیتی نا پاش آن پاش مثال اسے۔
