کشمیریک نسل درنسل تینا حق خودارادیت کن جہد کریر، جہانی برادری اوفتے دا حق انا تننگ کن سلامتی کونسل نا وعدہ غاتے پورو کے
اسلام آباد۔ 10 دسمبر (اے پی پی) بنجائی وزیر انسانی حق ڈاکٹر شیریں مزاری پارینے کہ کشمیریک نسل درنسل تینا حق خودارادیت کن جہد کرینو، جہانی برادری ءِ اوفتے حق خودارادیت تننگ کن اقوام متحدہ نا سلامتی کونسل نا وعدہ غاتے پورو کروئی مریک، اگرچہ دنیا اینو انسانی حق انا دے ءِ اڈتننگ ءِ ولے او مقبوضہ کشمیر اٹی بھارتی کوزہ گیر حکومت نا کنڈآن انسانی حق انا بھلو کچ اسے آ خلاف ورزی تے گوجالنگ کپسہ۔ داخیال آتا درشانی ءِ او سے شنبے نادے آ انسانی حق انا جہانی دے انا بابت تینا کلہو اٹی کرے۔ اوپارے کہ ننا آئین نا رداٹ ہر پاکستانی کن انسانی حق بانی پاکستان قائد اعظم نا تصور نا رداٹ ءِ، ہرا جہانی وعدہ غاتا پوروی و ننا خواجہ نا انسانی حق و انسانی وقار نا شرف کن مثال نا پیروی ءِ کیر۔ اوپارے کہ انسانی حق انا دے ننے تینا ہی ملک انا تہہ ٹی انسانی حق و دا حق انا رکھ انا جہانی شرف ءِ پک کننگ اٹ مون تروک چیلنج آتا مقابلہ ءِ کروئی مریک۔ اونا پاننگ ئس کہ کشمیریک نسل درنسل تینا حق خودارادیت کن جہد کرینو، جہانی برادری ءِ اوفتے حق خودارادیت تننگ کن اقوام متحدہ نا سلامتی کونسل نا وعدہ غاتے پورو کروئی مریک۔ اونا پاننگ ئس کہ چار تُو آن مقبوضہ کشمیر اٹی بھارتی جارحیت نا اسہ چرجوئی اس برجاءِ ہراٹی کشمیری تے بنداوی انسانی حق آن محروم تخنگانے، مودی حکومت نا فاشٹ پالیسی و اونا مقبوضہ جموں و کشمیر اٹی غیر کانودی گام گیج آتے جہانی کانود نا رداٹ جنگی ڈوہ اس گوندنگانے۔ اوپارے کہ اگرچہ دنیا اینو انسانی حق انا دے ءِ اڈتننگ ءِ، او مقبوضہ کشمیر اٹی بھارتی کوزہ گر حکومت نا کنڈآن انسانی حق انا بھلو کچ اسے آ خلاف ورزی تے گوجالنگ کپسہ، ہراڑے اونا کوزہ گر فوج عصمت دری ءِ جنگی سلہہ نا وڑاٹ کاریم اٹ اتیک، داکان بیدس زالبول و چناتا برخلاف پیلٹ گن کون آ غیر انسانی سلہہ غاتے ہم کاریم اٹ اتنگ انگ ءِ۔
