کوئٹہ۔ 14 فروری (اے پی پی) بمب ڈسپوزل اسکواڈ نا دلیر کارندہ غاک جیرت نا پوسکن ئُ مثل اس اڈتسر۔ ہراک تینا جان تا پرواہ ئِ کپرسا الس نا جان و مال انا رکھ اکن تینا جان تے ندر کریر۔ مسکوہی ٹی ہم کارندہ غاک بارودی مواد آتے ناکارہ جوڑ کرسا کودک انسانی جان تے بچفیسر ۔ بمب ڈسپوزل اسکواڈ نا کارندہ غاتا قربانی تے خراج تحسین پیش کینہ۔ داخیال آتا درشانی ئِ وزیراعلیٰ بلوچستان نواب ثناءاللہ خان زہری کوئٹہ ٹی بارودی مواد آتے ناکارہ جوڑ کرسا بمب ڈسپوزل اسکواڈ نا اِرا کارندہ غاتا شہیدی و ایلوفتا ٹھپی مننگ آ دلی ڈکھ و غم نا درشانی ئِ کرے۔ اوپارے کہ دلیر کارندہ غاتا دا کارنامہ غا نن اوفتے سلام پیش کینہ۔ وزیراعلیٰ واقعہ ٹی ٹھپی مروک آ کارندہ غاتے درمان نا گچین آسراتی تننگ نا ہم پارت کرینے۔ وزیراعلیٰ شہید کارندہ غاتا خاہوت آتون ہڑزخواہی و ہمدردی نا درشانی ئِ کرسا اللہ تعالیٰ آن اوفتا درجہ غاتا بڑزی و ٹھپی تا زوت دُراخی کن دعا کرینے۔
