کوئٹہ۔ 14 فروری (اے پی پی) ڈپٹی کمشنر واشک عالم فراز محمد حسنی پارینے کہ الس نا بنداوی و المی ویل آتا ایسری کن علاقائی کہول آ کھلی کچہری نا اڈتننگ نا مسخت الس نا ویل آتے اوفتادرگہ غا ایسر کننگ نائِ۔ دا چرجوئی ٹی ضلع واشک نا ضلعی افسر آک تینے خادم سرپند کرسا اوفتا ایسر نا چاری روا ویل آتا ایسری ٹی تینا پبی کڑد ئِ ادا کیر۔ داخیال آتا درشانی ئِ ڈپٹی کمشنر واشک تدوک آ دے بسیمہ ٹی اڈ ہلوک آ کھلی کچہری آن تران اٹی کرے۔ کھلی کچہری ٹی ونگ کمانڈنٹ کرنل سہیل، اسسٹنٹ کمشنر بسیمہ شفقت انور شاہوانی تون اوار کیہی محکمہ غاتا ضلعی آفیسر و علاقائی سرکڑدہ غاک ہم ساڑی ئسر۔ کھلی کچہری ٹی خلقت ڈپٹی کمشنر ئِ علاقائی ویل آتیان معلومدار کرے۔ ڈپٹی کمشنر پارے کہ علاقہ ٹی امن وایمنی ، جان جوڑی ، تعلیم، آبنوشی نا آسراتی تا فراوانی اونا اولی اولیت آک ئُ و الس نا جان و مال و عزت نا رکھ کانود نافذ کروک آادارہ غاتا اولین زمواری ئِ۔ اوپارے کہ کانود آن ہچ گہس بھلن اف و کانود نا خلاف ورزی کروک آتا برخلاف سخت کانودی کارروائی عمل اٹی اتنگک۔ ڈپٹی کمشنر واشک کھلی کچہری ٹی کیہی ویل آتا ایسری کن بروخت احکامات جاری کرے وخت اس کہ او بسیمہ کاریز نا صفائی کن اسہ لکھ روپئی و اسپورٹس کن 30 ہزار روپئی نغد تننگ نا پڑو کرے۔
