کوئٹہ۔ 14 فروری (اے پی پی) وزیراعلیٰ بلوچستان نواب ثناءاللہ خان زہری لین آف کنٹرول آ بھارتی فوج انا کنڈآن اشتعال انگیزی و بلاجواز سم کاری نا واقعہ نا سخت مذمت ئِ کرسا سم کاری نا نتیجہ ٹی پاک فوج انا مسہ کارندہ غاتا شہیدی آ دلی ڈکھ و غم نا درشانی ئِ کرینے۔ اوپاک فوج انا کنڈآن بھارتی بیدادی نا پبی ورندی تننگ آ اوفتے خراج تحسین پیش کرے۔ داڑے جاری مروک آ اسہ بیان اسے ٹی وزیراعلیٰ نا پاننگ ئِ کہ بھارت لین آف کنٹرول نا پدریسہ خلاف ورزی کننگ ئِ۔ جہانی برادری ئِ بھارت نا جارحانہ رویہ نا نئے بیرہ مذمت ئِ کروئی مرے بلکن بھارت ئِ بیدادی آن توننگ کن تینا اثرورسوخ ئِ ہم کاریم اٹ اتوئی مرے۔ ہراڑآن ڈیہہ ٹی حالیت آک خراب مننگ کیرہ۔ وزیراعلیٰ پارینے کہ بھارت نا دا اوچھے ہتھکنڈہ غاتیان نئے تو پاک فوج و نئے پاکستانی قوم مرعوب مننگ کیک، بلکن بھارت ئِ پبی وڑاٹ دندان شکن ورندی تننگک۔ بھارت مقبوضہ کشمیر اٹی جاری تینا ظلم و بیدادی و کشمیری الس نا تحریک خودارادیت آن دنیا نا نظر ئِ اسہ پلو کننگ کن داوڑنا کارروائی کننگ ئِ ولے اونا ناپاک عزم ئِ وخت اس ہم سرسہب مننگ کن الیپنہ۔ وزیراعلیٰ شہید سیکورٹی کارندہ غاتا درجہ غاتا بڑزی کن دعاہم کرینے۔ ہراک ارض پاکستان نا رکھ اکن تینا جان تے ندر کرینو۔
