وزیراعظم عمران خان نا ”ایزی فیبریکیٹڈ ہومز پرائیویٹ لمیٹڈ ڈٹ“ انا بنداو ءِ تخنگ نا دود آن تران

اسلام آباد۔ 18ستمبر (اے پی پی) وزیراعظم عمران خان حقدار و غریب بندغ آتے اڑزان اُراتا فراوانی ءِ حکومت نا اولیت گوندسا پارینے کہ حکومت ہاؤسنگ و کشت وکشار نا بشخ آتے ٹی زرکاریءِ مون آ دننگ ءِ خصوصی اہمیت تسنے، مست آن تیار مروک اُراتا تفنگ داخاطران المی ءِ کہ دا اڑزان و کم وخت اٹی تیار مننگ کیرہ، اڑزان اُراتا فراوانی نا ڈٹ حکومت نا فلیگ شپ پروجیکٹ ءِ، کشاری بشخ انا شونداری کن چین نا ٹیکنالوجی آن فائدہ ہرفنہ، فی ایکڑ پیدوار اٹی ودکی آن پاکستان نا اقتصادی شرح نمو نا ودکی اتون اوار اوار ملک آن نیزگاری نا چٹفنگ اٹی ہم کمک رسینگک، ملک انا واپاری نسخان ءِ کم کننگ کن برآمد آتے ٹی ودکی کینہ، چینی زرکارآک پاکستان اٹی صنعت آتے گدریفر، حکومت زرکارآتا آسراتی کن ہروڑنا کمک فراوان کیک۔ اوداہیت ءِ چارشنبے نادے آ داڑے ”ایزی فیبر یکیٹڈ ہومز پرائیویٹ لمیٹڈ ڈٹ“ انا بنداو نا دود آن تران کرسا پارے ہراٹی بنجائی کابینہ نا باسک آک، پاکستان اٹی چین نا سفیر یاؤجنگ و ایلو بڑزکو کمامدارآک ہم ساڑی ئسر۔ دا پلانٹ پنی آ چینی کمپنی ہنان ڈی آرکنسٹریشن پڑک ایم تھری خصوصی اقتصادی زون اٹ جوڑ کننگ ءِ۔ دا ہیت ذکر انا قابل ءِ وزیراعظم عمران خان نا ساڑی آ دور ہ بیجنگ اٹی ہنان ڈی آرکنسٹرکشن پڑک نا بڑزکو عہدیدار آتون اونا اوڑدہی ٹی پڑک ہندی طلب ءِ پورو کننگ کن پاکستان اٹی پری فیبریکیٹڈ اُراتا تیاری کن زرکاری کننگ و ٹیکنالوجی ءِ گدریفنگ نا فیصلہ کریسس، پری فیبر یکیٹڈ ہاؤسنگ پروجیکٹ نا بنائی دود آن تران کرسا وزیراعظم عمران خان پارے کہ پاکستان اِرا بشخ آتے ٹی زرکاری آ خصوصی چکار کننگ ءِ ہرافتے ٹی ہاؤسنگ و کشت و کشار نا بشخ اوارءُ۔ اوپارے کہ ہاؤسنگ نا ڈٹ حقدار بندغ آتے اڑزان اُراتا فراوانی نا بابت حکومت نا فلیگ شپ ڈٹ ءِ۔ اوپارے کہ دا ڈٹ ہنداچرجوئی نا اسہ کڑی اسے ہراڑا ملک اٹی اولیکو وار کاریم کننگ انگ ءِ۔ وزیراعظم پارے کہ پری فیبر یکیٹڈ ہاؤسز ملک اکن داخاطران المی ءُ و دا اڑزان و زوت تفنگرہ۔ اوپارے کہ گوادر اٹی دا ٹیکنالوجی آن فائدہ ہرفسا فائیو اسٹار بزنس سنٹر ءِ نئے بیرہ 6تُو انا گونڈ وخت اٹ پورو کننگانے بلکن دادے آپریشنل ہم کننگا۔ اوپارے کہ کراچی ٹی 40 درسد خلقت کچہ انگا آبادی ٹی رہینگرہ، ہنداوڑ اسلام آباد و لاہور نا چندی اہم ہند آتیا ہم کچہ ءُ آبادی ارے۔ اوپارے کہ ویل دادے کہ دا آبادی تیٹی رہینگوک آ بندغ آتے کن اُراہمہ تفنگے و ہزار آ بندغ آتیا تالان دا آبادی ءِ اُرایا فلیٹ آتا تفنگ اٹی ہراڑے تخنگے۔ دابابت پری فیبر یکیٹڈ ہاؤسز اہم کڑد ادا کیک۔ اوپارے کہ دا فلیٹ آک چار پنچ تُو اٹی پورو کننگ مریرہ و خلقت ءِ اوفتے ٹی گدریفسا ایلو ڈغار تے کمرشل کاریم اٹ اتنگ مریک۔ وزیراعظم عمران خان پارے کہ پری فیبر یکیٹڈ اُراتا تفنگ ننکن داخاطران ہم خصوصی اہمیت تخک کہ دا اڑزان ءُ ہرافتا تفنگ آن نن ڈغار ءِ زوت آن زوت کاریم اٹ اتنگ کینہ۔ اوپارے کہ داوڑنا آزموندہ بھارت و ترکی ٹی ہم سرسہب مسنے۔ داسہ اسہ ہندن ءُ ترند ترین ءُ عمل اسے ہرا کم آن کم وخت اٹی اُراتفنگ اٹ کمکار مننگ کیک۔ وزیراعظم پارے کہ زرکاری نا بابت خصوصی اہمیت نا ایلو اہم بشخ کشت وکشار ءِ، ننے دا بشخ اٹی زرکاری نا گرج ءِ انتئے کہ ننا فی ایکڑ پیدوار کم ءِ۔ اوپارے کہ چین نا پوسکن آ ٹیکنالوجی آن فائدہ ہرفنگ نا کمک اٹ نن فی ایکڑ پیدوار اٹ ودکی کینہ ہراڑان خلقی معیشت نا شونداری و خلقی علاقہ غاتا الس نا کٹیا ٹی ودکی کننگ مریک۔ اوپارے کہ اگہ کشاری بشخ انا پیدوار ءِ ودفنگ کرین تو داڑان پاکستان نامعاشی شرح شونداری ٹی ہم ودنگ کیک۔ وزیراعظم پارے کہ ہراتم اسہ وار فی ایکڑ پیدوار اٹی ودکی مریک تو ملک آن نیزگاری نا چٹفنگ اٹی ہم کمک رسینگک۔ کشت وکشار و ہاؤسنگ نا بشخ زرکاری نا بابت آن اہم ترین ءِ۔ اوپارے کہ حکومت ملکی برآمد آتے ٹی ودکی آہم خصوصی چکار کننگ ءِ ہرافتے ودفسا نن واپاری نسخان ءِ کم کننگ کینہ و داڑان زرمبادلہ نا کوڑی تیٹی ہم ودکی کننگ مریک۔ اوپارے کہ چین آن صنعت آتا گدریفنگ آن صنعتی بشخ انا شونداری ٹی کمک رسینگک و قومی برآمد آتے مون آ دننگ دوئی مریک۔ اوپارے کہ اومیت ءِ کہ چین نا نجی بشخ تینا صنعت آتے داڑے گدریفک انتئے کہ دا زرکارآتے کن آسان مریک۔ اوپارے کہ نن زرکارآتا ہروڑنا آسراتی کن غٹ تر ممکنہ گام گیج کینہ۔ وزیراعظم عمران خان چین نا سفیر یاؤجنگ نا کوشست آتا ستاءِ کرسا پارے کہ او پاکستان و چین اٹی ہاؤسنگ نا بشخ اٹی ہڑتوم آ کنڈآتا کمکاری و سی پیک نا شونداری ٹی اہم ءُ کڑد اس ادا کننگ ءِ۔ دود اٹی چندی ملک آتا سفیر و چندی معاشی شعبہ جات نا نمائندہ غاک ہم ساڑی ئسر۔ پری فیبر یکیٹڈ ہاؤسنگ پروجیکٹ اٹی پاک چین تین پہ تینی کمکاری ءِ مون آ دننگ نا بابت آن او چین نا پاکستان اٹی سفیرنا کارکڑدگی نا ستاءِ کرے۔