اقتصادی استحکام، پائیدار دیمروئی، تجارت ءُ سرمایہ کاری حکومت ءِ اولویت ءِ پد ءَ وفاقی وزیر خزانہ ءَ مائیکرو فنانس نیٹ ورک کانفرنس ءَ گوں  گشتانک

کراچی ۔7اکتوبر  (اے پی پی): وفاقی وزیر خزانہ سینیٹر محمد اورنگزیب ءَ گوشت کہ اقتصادی استحکام، پائیدار اقتصادی دیمروئی، ڈھانچہ ءِ اصلاحات، تجارت ءُ سرمایہ کاری، نوکیں معیشت ءُ مالیاتی آسراتی آناں رسائی حکومت ءِ شش مستریں اولی ترجی اَنت۔ گوستگیں دو ءُ نیم سال ءِ ساھت ءَ پاکستان ءَ اقتصادی استحکام ءِ ھاترا مزنیں دیمروئی کتگ۔ چار شمبے ءِ روچ ءَ پاکستان مائیکرو فنانس نیٹ ورک ءِ دہمی سالانہ مائیکرو فنانس کانفرنس ءَ ورچوئل رنگ ءَ گشتانک دیان ءَ وزیر ءِ ھزانگ ءَ گوشت کہ پاکستان ءِ کرنٹ اکاؤنٹ ءِ خسارہ کہ وتی مستریں تک ءَ جی ڈی پی ءِ نزیک ءَ 12.5درسد ءَ سر بوتگ ات گوستگیں مالی سال ءِ گڈ ءَ 2.6درسد ءَ چہ کم بوتگ۔ آئی ءَ گوشت کہ ملک ءِ زرّ ءِ ذخیرہ 21.4ارب ڈالر ءِ راجدپتری مزنیں کساس ءَ سر بوتگ کہ اے نزیک ءَ سئے ماہ ءِ درآمدات ءِ واستہ کافی اِنت۔ اپریل 2025ءَ چہ پاکستان ءِ سوورن کریڈٹ ریٹنگ ءَ سئے رند ءَ گہتری اتکگ وھدے کہ پاکستان 3ارب ڈالر ءِ یورو بانڈ ءِ سوبمندیں جاری کنگ ءِ وسیلگ ءَ جھان ءِ سرمایہ کاری مارکیٹ آنی تہ ءَ پدا واتر بوتگ۔ سینیٹر محمد اورنگزیب ءَ گوشت کہ یورو بانڈ ءِ جاری کنگ ءَ ایشیا، میاں اوستمانی، یورپ ءُ امریکہ ءِ سرمایہ کار آنی مھکمیں بھر زوری پاکستان ءِ سر ءَ گلوبل سرمایہ کار آنی دل یکیمی ءِ آدینک انت۔ آئی ءَ گوشت کہ برجائی اقتصادی سرگرمی ءُ رونق ءُ ٹوٹ ءِ اقتصادی چکر آنی سر ءَ چہ دیم ءَ رؤگ ءِ واستہ دائمی بنیات ءِ سر ءَ اقتصادی برجائی ءَ را مھکم کنگ المی اِنت۔ آئی ءَ گوشت کہ آیوکیں بھر ءَ کھپت ءِ بنیاد ءَ اقتصادی وسعت ءِ بدل ءَ پائیدار ءُ ذمہ دار اقتصادی دیمروئی ءِ سر ءَ دلگوشی دیگ بہ بیت۔ پاکستان ءِ معیشت سئے سال پیسر سنکچن ءِ تہ ءَ ات، گوستگیں مالی سال ءَ 3.7درسد ءِ گیشی بوتگ، وھدیکہ رواں مالی سال ءَ اقتصادی دیمروئی ءِ 4درسد ءَ چہ گیش بوھگ ءِ گمان اِنت۔ وزیر ءِ ھزانگ ءَ گوشت کہ ٹیکس، توانائی، سرکاری ادارگ، نجکاری ءُ سرکاری مالیات ءِ شوبگ آنی تہ ءَ ڈھانچہ ءِ اصلاحات حکومت ءِ اولی ترجی آنی تہ ءَ ھوار انت۔ حکومت اقتصادی چست ءُ ایر آنی تہ ءَ جندی شوبگ ءِ کرد ءَ را گیش گیش کنگ ءِ واستہ جزمیگ اِنت۔ آئی ءَ گوشت کہ پی آئی اے ءِ نجکاری ءِ تہ ءَ دو مزنیں ملکی سرمایہ کاری گل آنی نیمگ ءَ چہ نزیک ءَ 1.2ارب ڈالر ءِ یکجائی بولی نجی شعبہ ءِ گیش بوھوکیں اعتماد ءِ درشان اِنت۔ بین الاقوامی سرمایہ کار ہم ڈسکو ءِ نجکاری ءِ تہا گیشیں دلچسپی ءِ درشان کنگ ءَ انت ءُ سئے ترک کمپنیاں اولی ڈسکو ءِ پیشکش کنگ ءِ تہا دلچسپی ءِ درشانی کتگ۔ ھزانگ ءِ وزیر ءَ گوشت کہ پاکستان کمک آنی انحصار ءَ چہ تجارت ءُ سرمایہ کاری ءِ نیمگ ءَ رھادگ بوھگ ءَ انت۔ دو نیمگی شریک آنی برجاھیں کمک ستا کرز اِیت بلے مھکمیں تجارتی ءُ سرمایہ کاری ءِ سیادی گیش المی اَنت۔ آئی ءَ گوشت کہ پاکستان ءَ را نوکیں معیشت ءِ واستہ وت ءَ را گہتر تیار کنگ لوٹ ایت ایشی ءِ تہ ءَ آرٹیفیشل انٹیلی جنس، بلاکچین ءُ ویب تھری ھوار انت۔ پاکستانی فری لانسرز ءَ گوستگیں مالی سال ءِ تہ ءَ آئی ٹی سروسز ءِ برآمدات ءَ چہ 1.6ارب ڈالر ءِ آمدنی کتگ۔ ورنا آناں مزنیں ارزشت ءِ ڈیجیٹل سروسز ءِ نیمگ ءَ برگ ءِ واستہ نوکیں مہارت آنی تربیت ءِ گوما استیں مہارت آناں گہتر کنگ المی اِنت۔ سینیٹر محمد اورنگزیب ءَ گوشت کہ مالی آسراتی آنی تہ ءَ کمیں رسائی ءِ واھندیں الس ءُ کمیونٹی آنی واستہ مالی وسیلگ آناں رسائی ءَ را گیش کنگ ءِ ضلورت اِنت۔ اولی رند ءَ لوگ ءِ گرگ ءِ واستہ سستی ہاؤسنگ ءِ واستہ 76ارب کلدار ءِ نزیک ءَ کمک کنگ بوتگ وھدیکہ بینکنگ سسٹم ءَ 400ارب کلدار ءَ چہ گیش منظوری داتگ۔ آئی ءَ گوشت کہ کسانیں کشت ءُ کشاری آنی واستہ ڈیجیٹل ءُ کولیٹرل فری مالی کمک ءِ اسکیم ءِ تہ ءَ گوستگیں ہفت ءُ ہشت ماہ ءِ تہ ءَ نزیک ءَ 6ارب کلدار منظوری بوتگ ءُ دو ارب ءَ چہ گیش ریلیز کنگ بوتگ۔ وزیر ءِ ھزانگ ءَ گوشت کہ ایس ایم ایز، کشت ءُ کشاری ءُ ارزانیں ھاوسنگ ءِ واستہ مالی کمک ءِ تہ ءَ گیشی ءِ واستہ کمرشل بینک ءُ مائیکرو فنانس سیکٹر ءِ نیام ءَ مھکمیں کمک ءِ ضلورت اِنت۔ مالیاتی رسائی ءِ سٹیئرنگ کمیٹی ءُ پاکستان مائیکرو فنانس نیٹ ورک مالی رد ءَ نزوریں مردم آناں رسائی ءِ تہ ءَ گیشی ءِ تہ ءَ مزنیں کرد پیلو کت کنت۔ آئی ءَ مائیکرو فنانس ادارگ آناں ڈیجیٹل لینڈنگ سسٹم ءَ را مھکم کنگ، کسٹمر ءِ تجربگ ءَ را گہتر کنگ ءُ موثر کریڈٹ اسکورنگ ماڈل جوڑ کنگ ءِ سر ءَ زور پر دات۔ وام ءِ پھجارینگ ءِ تہ ءَ متبادل ڈیٹا ءُ ڈیجیٹل کریڈٹ سسٹم ءِ کارمردی ءَ را گیش کنگ ءِ ضلورت اِنت۔ آئی ءَ گوشت کہ وام ءِ پیسلہ نہ ایوک ءَ وثیقہ ءِ بنیاد ءَ کنگ بہ بنت بلکیں وام ءِ پچ گرگ ءِ توانائی، موسمی سبب ءُ سستی ءِ سر ءَ ھم ھیال داری کنگ بہ بیت۔ مائیکرو فنانس ءِ شوبگ ءَ را ھم وام ءِ کساس ءِ بدل ءَ وتی حقیقی معاشی ءُ چاگردی آسر آنی سر ءَ دلگوشی دیگی اِنت۔ وزیر خزانہ ءَ گوشت کہ کشت ءُ کشاری ءِ شوبگ ءُ ایس ایم ایز ءِ تہ ءَ نوکیں وامدار آنی کساس ءَ را گیش کنگ مائیکرو فنانس ءِ شوبگ ءِ یک کلیدی ترجی ءِ بہ بیت۔ برآمدات ءِ ری فنانس ءِ حد ءَ را یک کھرب ءَ چہ یک ءُ نیم کھرب ءَ گیش کنگ بوتگ وھدیکہ نوکیں حد ءِ 20درسد ایس ایم ایز ءِ واستہ ریزرو کنگ بوتگ۔ آئی ءَ گوشت کہ مزنیں ایکسپورٹر آنی ویلیو ءُ سپلائی چین ءَ گوں سیادی داروکیں کاروبار آناں 4.5درسد ءِ ھاسیں شرح ءَ مالیاتی آسراتی رسگ ءِ موہ رس ایت۔ سینیٹر محمد اورنگزیب ءَ گوشت کہ میاں اوستمانی ءُ مزنیں کاروبار آنی تہ ءَ کسانیں وامدار آنی تہ ءَ گیشی، روزگار ءِ موہ آنی پیداک کنگ ءُ زالبول آنی اقتصادی ھوار کنگ ءَ را ھم سوبمندی ءِ پیمائش آنی تہ ءَ ھوار کنگ بہ بیت۔ زالبولیں کاروباری مردمانی بھر زوری ءَ را گیش کنگ مالی شمولیت ءُ پائیداریں زندمان ءِ واستہ المی اِنت۔ آئی ءَ گوشت کہ مائیکرو فنانس ءِ تہ ءَ آسر آنی سر ءَ بنیات ءِ پیمائش مالیاتی شمولیت، پیداواری سرگرمی ءُ پائیدار روزی ءِ دیمروئی ءِ تہ ءَ جوانیں کرد پیلو کنت۔ وفاقی وزیر ءَ گوشت کہ کانفرنس ءِ تہ ءَ گپ ءُ تران سرجمیں پاکستان ءَ مائیکرو فنانس ءِ شوبگ ءَ را مھکم کنگ ءُ الس، کاروباری مردم ءُ کمیونٹیز ءَ را مالیاتی آسراتی آنی رسائی ءَ را گیش کنگ ءِ واستہ المی انت۔