مزن وزیر شہباز شریف ءَ مین لائن ون ءِ اپ گریڈیشن ءِ سر ءَ ترندی ءَ کار کنگ ءِ پنت ءُ شون داتگ

اسلام آباد۔7اکتوبر  (اے پی پی): مزن وزیر محمد شہباز شریف ءَ پاکستان ریلوے ءِ تہ ءَ مین لائن ون ءِ اپ گریڈیشن ءُ کارپوریٹ طرز ءِ اصلاحات ءِ سر ءَ ترندی ءَ گوں کار کنگ ءِ پنت ءُ شون کنان ءَ گوشت کہ مین لائن ون ءِ نوکیں رنگ ءَ جوڑ کنگ پاکستان ریلوے ءِ ٹرانسپورٹ ءِ تہ ءَ گیشی ءِ واستہ کلیدی ارزشت ءِ واھند اِنت۔ ایم ایل ون ءِ جوڑیشت ءَ را ریلوے ءِ ارباں کلدار ءِ شناخت بوتگیں زمین ءَ را کارمرد کنگ ءَ تجارتی بنیاد ءَ چہ دیم ءَ برگ بہ بیت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ سروکی ءَ اسلام آباد ءَ پاکستان ریلوے ءِ تہ ءَ اصلاحات ءِ ھوالگ ءَ جائزہ دیوان برجم دارگ بوت۔ مزن وزیر ءَ چیئرمین نیب ءِ سروکی ءَ نیب ءُ وزارت ریلوے ءِ ٹیم آنی پاکستان ریلوے ءِ مقبوضہ زمین آنی پجار ءُ پچ گرگ ءِ ھوالگ ءَ کوشست آناں ساڑات۔ دیوان ءَ گوں گشتانک دیان ءَ مزن وزیر ءَ گوشت کہ ریلوے ءِ جائیداد آنی حقیقی تجارتی توان ءَ را کارمرد کنگ ءِ ضلورت اِنت ءُ ریلوے ءِ ارزشتی ایں زمین آناں تجارتی مول ءُ مراد آنی واستہ جوانیں رنگ ءَ کارمرد کنان ءَ ملکی معیشت ءُ ریلوے ءِ دیمروئی ءِ تہ ءَ کرد پیلو کنگ ءِ ضلورت اِنت۔ آئی ءَ گوشت کہ ریلوے ءَ را مھکم ءُ معاشی رد ءَ وت واجہ جوڑ کنگ ءِ واستہ کارپوریٹ طرز ءِ اصلاحات حکومت ءِ اولی ترجی آنی تہ ءَ ھوار اَنت۔ ریلوے ءِ وزیر ریلوے ءَ را منافع بخش جوڑ کنگ ءُ ریلوے ءِ کاروائی ءَ را گہتر جوڑ کنگ ءِ واستہ سک باز محنت کنگ ءَ انت۔ مزن وزیر ءَ ایم ایل ون ءِ جوڑیشت ءِ واستہ جتا جتائیں تجارتی منصوبگ آنی وسیلگ ءَ ریلوے ءِ زمین آنی سر ءَ بینک فنڈنگ ​​ءِ کارمرد کنگ ءِ منظوری دات۔ مزن وزیر ءَ ریلوے ءِ زمین ءِ حقیقی تجارتی گنجائش ءَ را ھیال ءَ دارگ ءَ آیوکیں دو ھپتگ آنی تہ ءَ یک ٹوھیں منصوبگ ءِ پیش کنگ ءِ ھم پنت ءُ شون کتگ۔ گند ءُ نند ءَ گوشگ بوت کہ 1726کلومیٹر دراجیں ایم ایل ون ءِ اپ گریڈیشن ءَ را چار مزنیں سیکشن آنی تہ ءَ بھر ءُ بانگ کنگ بوتگ ایشی ءِ تہ ءَ کراچی روہری، روہری ملتان، ملتان لاہور ءُ لاہور پشاور سیکشن ھوار اَنت۔ دیوان ءَ را سرپد کنگ بوت کہ کراچی روہری سیکشن ءِ اپ گریڈیشن ءِ واستہ میاں اوستمانی مالی کمک کارمرد کنگ بوھگ ءَ انت وھدیکہ ایم ایل ون ءِ ایندگر سیکشن آنی واستہ بنجاہی وسیلگ آنی نیمگ ءَ چہ فنڈنگ ​​ءِ منصوبگ بندی کنگ بوھگ ءَ انت۔ گند ءُ نند ءَ ایم ایل ون پروجیکٹ، کراچی روہری سیکشن ءِ جوڑیشت ءِ جتاجتائیں تک ءُ پھنات آنی بابت ءَ سرپدی دات۔ پیشرفت ءُ ریلوے ءِ ملکیت ءِ زمین ءِ بابت ءَ بریفنگ دیگ بوت۔ مزن وزیر ءَ پنت ءُ شون کت کہ ریلوے ءِ ریکلیمڈ زمین ءَ را تجارتی بنیاد ءَ کارمرد کنگ ءُ ایم ایل ون ءِ جوڑیشت ءِ واستہ بینک آنی نیمگ ءَ چہ فنڈز زورگ ءِ واستہ دو ہفتگ ءِ تہ ءَ یک سرجمیں ایکشن پلان پیش کنگ بہ بیت۔ گند ءُ نند ءَ وفاقی وزیر احسن اقبال، احد خان چیما، محمد اورنگزیب، حنیف عباسی، وزیر مملکت بلال اظہر کیانی، گورنر اسٹیٹ بینک جمیل احمد، چیئرمین نیب لیفٹیننٹ جنرل (ریٹائرڈ) نظیر احمد بٹ ءُ سیادی داروکیں مزنیں کارندہ آں بہر زرتگ۔