اسلام آباد۔ 04ستمبر (اے پی پی)وزیراعظم عمران خان کراچی طورخم و کراچی چمن روٹ اتون اوار جتا شاہراہ تیا جوڑ کروک آ جتا ادارہ و ایجنسی تا چیک پوسٹ آتیا ٹرک و مال بردار گاڈی تیان غیر کانودی وڑاٹ پیسہ ہلنگ نا نوٹس ءِ ہلسا تعلقدار ادارہ غاتے پارت کرینے کہ دا بابت ایس او پیز آ نظرثانی کننگے و داویل انا ایسری کن گام گیج کننگے۔ وزیراعظم چیک پوسٹ آتا کچ ءِ کم کننگ و چاروکی ءِ ہم گچین کننگ نا پارت کرے۔ چارشنبے نادے وزیراعظم آفس آن جاری مراسلہ نا رداٹ جتا ذریعہ غاتے اٹ وزیراعظم نا علم اٹ داہیت ءِ اتنگا کہ کراچی طورخم و کراچی چمن روٹ آتون اوار قومی شاہراہ تیا پولیس، ایکسائز، کسٹمز، رینجرز، ایف سی، کوسٹ گارڈ آتون اوار کیہی سرکاری ادارہ و ایجنسی تا کنڈآن ملک اٹی مال بردار گاڈی تیان پیسہ غاتا غیر کانودی ہلنگ نا چرجوئی ودسا ہِننگ ءِ ہراڑان نئے بیرہ مال برداری نا خڑچ و کاروبار نا خڑچ اٹی ودکی مننگ ءِ بلکن چندی کانود نافذ کروک آ ادارہ، سیکورٹی ایجنسی و انسداد منشیات نا ادارہ غاتا کنڈآن وصولی تا سوب الس ءِ مشکل آتون مون تروک تمک و راج اٹی داڑان اجتماعی وڈی خوری ءِ فروغ ملک و دا چرجوئی ملک و حکومتی مشینری نا بدنامی نا سوب ہم ارے۔ مراسلہ ٹی پاننگانے کہ غیر کانودی طورخم آ پیسہ غاتا وصولی چاروکی نا نزور ن ظام نا سوب ءِ یا تو دا چرجوئی ءِ باآسانی برداشت کننگ انگ ءِ ہراکہ ای اینڈ ڈی نا قاعدہ غا سوج انا نشان اسے۔ مراسلہ ٹی پاننگانے کہ دا تاثرہم ارے کہ غیر کانودی ذریعہ اٹ دوئی مروک آ پیسہ غاتے جتا کہول آتیا بشخنگک۔ وزیراعظم دا معاملہ نا سخت نوٹس ءِ ہلسا پارت کرینے کہ دا ویل انا ایسری کن تعلقدار ادارہ غاک ایس اوپیز آ نظرثانی کیر۔ اوایلو کڑدہ، ادارہ غاتا سلابت و اواری اٹ چیک پوسٹ آتا کچ ءِ معقول حد اسکان کم کننگ و اسیجا چیک پوسٹ جوڑ کننگ نا پارت کرینے۔ وزیراعظم دا چرجوئی ٹی چاروکی نا نظام ءِ گچین کننگ نا پارت کرینے۔ وزیراعظم دا پرمان ءِ ہم تس کہ دا عمل ءِ لازما 5اکتوبر آن مست پورو کننگے و 5اکتوبرآن پد چیک پوسٹ آتیا بھتہ ہلوک آ عملہ و اوفتا چاروکی آ سلوک آفیسر بشمول وزارت و ادارہ انتظامی سروک نا برخلاف سخت کارروائی کننگک و تعلقدار انتظامی آفیسر نا کنڈآن چاروکی کروک آ آفیسر نا برخلاف کارروائی کپننگ نا حالیت اٹ چیف سیکرٹری، آئی جیز و ڈی جی تا برخلاف کارروائی کننگک۔ مراسلہ ٹی غٹ تعلقدار ادارہ غاتے پارت کننگانے کہ وزیراعظم نا پرمان تیا دمدستی عمل کرسا 5اکتوبر آن مست رپورٹ ءِ گدریفر۔
