بنجائی وزیر امور کشمیر و گلگت بلتستان علی امین گنڈاپور نا ریڈیو پاکستان نا پروگرام اٹی گپ و تران

اسلام آباد۔ 04 ستمبر (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ پاکستانی قوم، فوج و سیاسی سرکڑدہ غاک ہر بہا آ کشمیری تا کمک ءِ کننگ کن پرعزم ءُ۔ ریڈیو پاکستان نا اسہ پروگرام اسے ٹی گپ و تران کرسا اوپارے کہ وزیراعظم عمران خان تینے کشمیری الس نا سفیر گوندانے۔ اوپارے کہ آجوئی کن کشمیری تا قربانی تیان او تینا حق خودارادیت نا دوئی ٹی سرسہب مریرہ، چندی ملک آک کشمیر آ پاکستان نا موقف نا مخ تفی ءِ کرینے۔ بنجائی وزیر پارے کہ بھارتی حکومت خوفزدہ ءِ و داحقیقت آن واقف ءِ کہ ہراتم کرفیو ءِ ہرفنگک تو مچ آ مقبوضہ وادی ”گوانڈیا گو“ و ”کشمیر مریک پاکستان“ نا نعرہ غاتیان تالان مریک۔ اوپارے کہ مودی مقبوضہ کشمیر اٹی نازی ازم انا پالیسی آ عمل کننگ ءِ۔ اومچ آ امت مسلمہ غا زور شاغا کہ او اسلام مخالف عنصر آتا برخلاف یکجا مریر۔ اوپارے کہ پاکستان نا گچین خارجہ پالیسی آن بھارت آ کرفیو نا چٹفنگ کن دباؤ ودنگ ءِ۔ اوپارے کہ مقبوضہ وادی نا بابت بھارتی آئین اٹی ترمیم غیر آئینی و غیر کانودی ءِ ہرا جہانی کانود نا ہم برخلاف ءِ۔