اسلام آباد۔ 03ستمبر (اے پی پی) قطر امیری فضائیہ نا سروک اسٹاف میجر جنرل (پائلٹ) سالم حمد عقیل النابت تینا ڈل اتون اوار ایئر ہیڈ کوارٹر ز اسلام آباد نا دورہ ءِ کرے و پاک فضائیہ نا سروک ایئر چیف مارشل مجاہد انور خان تون اوڑدہی کرے۔ ترجمان پاک فضائیہ نا رداٹ قطر امیری فضائیہ نا سروک نا بننگ آ پاک فضائیہ نا سروک ایئر چیف مارشل مجاہد انور خان شرفدار آ مہمان ءِ بخیر کرے۔ پاک فضائیہ نا اسہ چاق و چوبند دستہ اس اودے سلامی پیش کرے۔ شرفدار آ مہمان پاک فضائیہ نا شہید آتے خراج عقیدت پیش کننگ کن یات گار شہداء آ پھل آتا چادر اس شاغا۔ اوکان پد کمانڈر قطر امیری فضائیہ پاک فضائیہ نا سروک تون سرجم اوڑدہی کرے۔ ہڑتوم آ فضائی سروک آک علاقائی سلامتی و تین پہ تینی کمکاری نا معاملہ غاتیا گپ و تران کریر۔ کمانڈر قطر امیری فضائیہ پاک فضائیہ نا کسبی چاہنداری نا ستاءِ کرے و پاک فضائیہ نا خودانحصاری نا پڑ اٹ زیات شونداری نا ستاءِ کرے۔ پاک فضائیہ نا سروک پاکستان و قطر انا نیام اٹ برادرانہ تعلقداری و تین پہ تینی کمکاری آ گپ و تران کریر۔ ہڑتوم آشرفدار شخصیت آک فضائی فوج آتا نیام اٹ بے مٹ دوستانہ تعلقداری تے پوسکن آ جہت آتیان روشنا کرفنگ نا عزم انا اعادہ کریر۔
