حاسیں اقتصادی زونءَ را زوتاں چہ زوت پچ کنگ بیت
اسلام آباد۔9اگست(اے پی پی)مزن وزیر عمران خانءَ حاسیں اقتصادی زون ءَ را زوتاں چہ زوت پچ کنگءِ ارزشتءِ سرءَ زور پِرداتگء ُ آئیءَ گشتگ کہ اقتصادی زون ءَ را زوتاں چہ زوت پچ کنگء ُ اؤدا بجلی، گیس، آپ ء ُ روڈ انفراسٹرکچر وڑیں بازیں آسراتی دیئگ حکومتءِ دلگوشی اِنت۔ آئیءَ اے گپ جمعہ ءِ روچءَ ملک ءَ حاسیں اقتصادی زون آنی ہوالگءَ مزن تک ءِ دیوانءِ سروکی کنانءَ کتگ۔ دیوان ءَ منصوبہ بندی ءِ وزیر مخدوم خسروبختیار، توانائی ءِ وزیر عمر ایوب خان، بیپاری ءِ صلہ کار عبدالرزاق داؤد، حزانگءِ صلہ کار عبدالحفیظ شیخ، حاسیں کمک کار ندیم بابر، زرکاری بورڈ ءِ چیئرمین زبیر گیلانی، ڈپٹی چیئرمین پلاننگ جہانزیب خان،ہمگرنچیں بنجاہی سیکرٹریز، صوبائی سیکرٹریز ء ُ دگہ سینئر افسر ہوار بوتگ اَنت۔ مزن وزیر عمران خان ءَ گشتگ کہ حاسیں اقتصادی زون آنی پچ بوہگءَ چہ صنعتی عمل گشاد بیتء ُ ورناہ ء ُ ہنر مندآں روزگارءِ موہ رسیت۔ مزن وزیر ءَ زرکاری بورڈ ء ِ چیئرمین زبیر گیلانی ءَ را حاسیں اقتصادی زون ءِ فوکل پرسن جوڑ کت۔ زرکاری بورڈءِ چیئرمین حاسیں اقتصادی زونءَ بجلی، آپ، گیسء ُ ایندگہ آسراتی سرکنگءِ ہوالگءَ ٹائم فریم جوڑ کنتء ُ مزن وزیر ءَ را رپورٹ پیش کنت۔
