پاکستان اٹی 2020ء ٹی پنچ دے ئی ورلڈ ٹورازم فورم نا اڈتننگ نا فیصلہ
اسلام آباد۔ 09 اگست (اے پی پی) وزیراعظم عمران خان تون ورلڈ ٹورازم فورم نا ڈل انا اوڑدہی ٹی پاکستان اٹی 2020ء ٹی پنچ دے ئی ورلڈ ٹورازم فورم نا اڈتننگ نا فیصلہ کننگانے ہراٹی کم و ود اسہ ہزار درملکی مندوبین بشخ ہلیرہ۔ وزیر اعظم عمران خان تون ورلڈ ٹورازم فورم نا ڈل جمعہ نادے آ داڑے صدر ایگزیکٹو بورڈ ورلڈ ٹورازم فورم بولوت بیگس انا کماشی ٹی اوڑدہی کرے۔ اوڑدہی ٹی خصوصی کمکار سید ذوالفقار عباس بخاری ہم ساڑی ئس۔ داوخت آ فیصلہ کننگاکہ 2020ء ٹی ورلڈ ٹورازم فورم ءِ پاکستان اٹ اڈ تننگک ہرا پنچ دے برجاسلک۔ پاکستان اٹی اڈ ہلوک آ فورم اٹی کم و ود اسہ ہزار درملکی مندوبین بشخ ہلیرہ۔ وزیراعظم ڈل ءِ پاکستان اٹی سیل و سوات نا وارخواہی تا بارواٹ سرجم وڑاٹ معلومدار کرے۔ وزیراعظم عمران خان پارے کہ سیل و سوات نا کیہی بشخ خاص کر ماؤنٹین ٹورازم، مذہبی ٹورازم، کرکی سیل و سوات و ایلو بشخ آتے ٹی بے کچ کچ ساڑی ءِ، ہرافتے کاریم اٹ اتنگ آ چکار کننگ اُن اوپارے کہ مستین اٹی سیل و سوات نا مون آ دننگ آ ہچ ءُ چکار اس کننگتنے ولے ساڑی حکومت سیل وسوات ءِ مون آ دننگ کن پبی کوشست کننگ ءِ۔ وزیراعظم پارے کہ سیل و سوات ءِ مون آ دننگ نا چرجوئی ٹی داہیت ءِ خصوصی وڑاٹ مون آ تخنگ انگ ءِ کہ قدرتی حسن و ماحولیات نا رکھ و راجی قدر انا پاسداری ءِ المی کننگے۔ اوپارے کہ بلوچستان نا کرکی علاقہ غاتیا ہشت پوسکن ءُ سیل وسواتی ہند جوڑ کننگک۔
