لاہور۔ 09 اگست (اے پی پی) لاہور نا احتساب عدالت چوہدری شوگر ملز کیس اٹی دزگیر مسلم لیگ (ن) نا راہشون و مسکوہی وزیراعظم نواز شریف نا مسڑ مریم نواز و یوسف عباس ءِ 12دے ئی جسمانی ریمانڈ آ نیب انا حوالہ کرے۔ احتساب عدالت نا جج نعیم ارشد ملک کیس انا سماعت ءِ کرے۔ جمعہ نادے آ مریم نواز و اونا چچا زاد ایلم یوسف عباس ءِ سخت سیکورٹی ٹی احتساب عدالت پیش کننگا۔ مریم نواز نا کمرہ عدالت پیش مننگ تون ہی وکیل آک ترند نعرہ خلکر۔ شورشرابہ کننگ و سیلفی ہلنگ آ عدالت سخت ترندی نا درشانی ءِ کرے۔ نیب پراسیکوٹر مریم نواز و یوسف عباس نا پانزدہ دے ئی جسمانی ریمانڈ نا خواست کرے۔ اونا پاننگ ئس مریم نواز 1992آن 1997اسکان چوہدری شوگرمل انا ڈائریکٹر ئس۔ ہشتاد ءُ چار لکھ انا شیئر ودسا چل و یک کروڈ نا مس۔ شیئرز آتا خریداری نا پیسہ غاتا بارواٹ معلومداری تفننگ انگ ءِ۔ مریم نواز نا وکیل جسمانی ریمانڈ نا مخالفت ءِ کرے۔ اوپارے کہ نیب مریم نواز نا دزگیری نا سوب آتیان معلومدار اف۔ کانود نا رداٹ خون و داڑیلی آن بیدس اسہ کیس اسے ٹی ہم زالبولءِ جسمانی ریمانڈ تننگ مفک ولے عدالت مریم نواز و یوسف عباس ءِ 12دے ئی جسمانی ریمانڈ آ 21اگست اسکان نیب اناحوالہ کرے۔ پیشی نا وخت آ مریم نواز میڈیا تون گپ وتران کرسا پارے کہ نیب وارنٹ دزگیری آ دستخط کرفوئی مرے ای انکار کریٹ۔ نیب بے سوب دُن ءُ کیس جوڑ کننگ خواہک۔ ہراٹی کنا پیرہ تینا دوتے اٹ کٹسا سرمایہ خلک۔ ایلو کنڈ عدالت رمضان شوگرملز کیس اٹی حمزہ شہباز نا جوڈیشل ریمانڈ اٹی 12دے انا ودکی کرے۔ ہندا کیس اٹی عدالت شہباز شریف نا حاضری معافی نا درخواست ءِ منظور کرسا سماعت ءِ بیست و یک اگست اسکان ملتوی کرے۔ کمرہ عدالت اٹی مریم، حمزہ شہباز، کیپٹن صفدر و جنید صفدر اسہ ایلو تون ہیت کرسا کریر۔
