اسلام آباد۔ 09 اگست (اے پی پی) وزیر مملکت موسمیاتی بدلی زرتاج گل پارینے کہ سینیٹ گچین کاری تیٹی باتننگ آن پد اپوزیشن کنفیوژن نا گواچی ءِ، پاکستان تحریک انصاف نا پالیسی تیٹی اپوزیشن ءِ بے سہبی تون مون تروک ءِ، 14اگست آن بنجائی دارالحکومت اٹی پلاسٹک بیگ آتیا پابندی نا بابت آگہی مہم سرسہبی اٹ برجاءِ، وزیراعظم عمران خان گچین کاری تے کٹنگ نا آخا بلکن پوسکن آ چین نا آخبت ءِ روشنا کننگ نا ہیت ءِ کیک۔ اے پی پی تون گپ و تران کرسا وزیر مملکت پارے کہ پوسکن آ دور اٹی میڈیا نا کڑد بھاز اہم مسنے، لس گچین کاری تیٹی کنا سرسہبی ٹی میڈیا نا اہم ءُ کڑد اسے۔ اوپارے کہ اسہ ڈٹ اسے ہم ہمووخت اسکان جوان وڑاٹ ایسر اسکان سرکننگ مفک ہراوخت اسکان میڈیا ان بورڈ مف۔ اوپارے کہ سینیٹ گچین کاری تیان پد اپوزیشن کنفیوژن نا گواچی ءِ و پاکستان تحریک انصاف اوفتے شکست تسنے۔ اوپارے کہ موسمیاتی بدلی تیان پاکستان بھاز بے وڑ زہمی مننگ ءِ ننے غٹ ءِ اواری اٹ گام گیج کروئی مریک ہراٹی الس نا کمک بے کچ اہمیت تخک۔ اوپارے کہ ملک ءِ سیم تیان زیات خلیس موسمیاتی بدلی آن ءِ انتئے کہ دادوراٹی موسمیاتی بدلی اسہ بھلو ویل اس جوڑ مسنے، ترند پِر، نوکاپ، خشک کرکی و ایلو آفت آتیان کشت وکشار نا بشخ بھاز بے وڑ زہمی مننگ ءِ۔ اوپارے کہ عمران خان اسہ مر ہروک ءُ لیڈر اسے ہرا گچین کاری تے کٹنگ آن زیات پوسکن آ چین تا آخبت ءِ روشنا کننگ نا ہیت ءِ کیک و او قوم ءِ مایوس کپک۔ اوپارے کہ ننا وزارت اسہ سال اٹی بے کچ اہم ہدف دوئی کرینے و نن وزیراعظم نا کلین اینڈ گرین پاکستان ڈٹ، سالڈویسٹ مینجمنٹ، کُننگ کن ساف دیر و ایلو ڈٹ آتیا کاریم کننگ ءِ۔ اوپارے کہ پلاسٹک نا شاپنگ بیگ آتا کاریم اٹ اتنگ نا چٹفنگ کن الس اٹی آگاہی مہم سرسہبی اٹ برجاءِ تانکہ اودافتاکاریم اٹ اتنگ ءِ ہلسا پچ انا بیگ آتے کاریم اٹ اتیر۔ اوپارے کہ 14اگست آن بنجائی دارالحکومت اٹی پلاسٹک نا شاپنگ بیگ آتیا پابندی خلنگ انگ ءِ۔ اوپارے کہ ملک اٹی پلاسٹک بیگ آتا کاریم اٹ اتنگ اٹی تشویشناک حد اسکان ودکی مننگ ءِ، دا پاسٹک آک نئے بیرہ انسانی جان جوڑی کن نسخان دہ ءُ بلکن سمندر اٹی داڑان زیاری مواد ہم ہِننگ ءِ، ہراآبی حیات و ڈغار نا زرخیزی کن تباہ کن ءُ۔
