اسلام آباد۔ 09 اگست (اے پی پی) چیئرمین سینیٹ محمد صادق سنجرانی سینیٹ اٹی قائد ایوان و قائد حزب اختلاف نا سلابت اٹ کشمیر نا ساڑی آ حالیت آتے تالان کننگ، بھارت نا ہٹ دھرمی و اقوام متحدہ نا قرارداد آتا برعکس کشمیر نا ساڑی حیثیت ءِ چٹفنگ نا بابت آئینی بدلی آن معلومدار کننگ کن اہم پارلیمانی ادارہ و ملک آتے ٹی ایوان بالا نا خصوصی ڈل آتے مون تننگ نا فیصلہ کرے۔ دا ڈل آتے امریکہ، روس، بین الاپارلیمانی یونین، یورپین یونین و اسلامی ملک آتا تنظیم او آئی سی آ گدریفنگک ہراڑکن پروگرام اس جوڑ کننگ انگ ءِ، امریکہ غا ہنوک آ ڈل انا سروک مسکوہی چیئرمین سینیٹ سینیٹر فاروق حمید نائیک وخت اس کہ اوڑتون اوار باسک آتے ٹی سینیٹر نعمان وزیر و سینیٹر انوارالحق کاکڑ اوارو۔ روس اکن ترتیب تروک آ ڈل انا کماشی ءِ بیرسٹر محمد علی خان سیف کیک وخت اس کہ ڈل اٹی سینیٹر سسی پلیجو و سینیٹر ڈاکٹر شہزاد وسیم اوارو۔ بین الاپارلیمانی یونین نا سرکڑدہ غاتون اوڑدہی کن ہنوک آ ڈل انا کماشی ءِ سینیٹر محسن عزیز کیک وخت اس کہ اوڑتون اوار سینیٹر گیان چند و سینیٹر آغاشاہ زیب درانی ڈل انا بشخ مریرہ۔ یورپین یونین تون رابطہ کن سینیٹر مشاہد حسین سید ڈل انا کماشی ءِ کیک وخت اس کہ سینیٹر ولید اقبال، سینیٹر ہلال الرحمان و سینیٹر سرفرازا حمد بگٹی اوڑتون اوار مریرہ۔ اسلامی ملک آتا تنظیم او آئی سی نا مون آ کشمیر نا ساڑی آ حالیت آتے پیش کننگ کن سینیٹ اٹی قائد حزب اختلاف سینیٹر راجہ محمد ظفرالحق ڈل انا سروک مریک وخت اس کہ اوڑتون اوار باسک آتے ٹی مسکوہی ڈپٹی چیئرمین سینیٹ عبدالغفور حیدری، سینیٹر سراج الحق و سینیٹر حافظ عبدالکریم اوار مریرہ۔
