اسلام آباد۔ 09 اگست (اے پی پی) وزیراعظم نا خصوصی کمکار جان جوڑی ڈاکٹر ظفر مرزا میڈیا غا چلینگوک آ خبر تا نوٹس ءِ ہلک ہرافتے ٹی پاننگانے کہ سعودی عرب اٹی پاکستانی ڈاکٹر آتا نوکریک چٹنگ ءُ۔ وزارت جان جوڑی نا ذرائع نا رداٹ ڈاکٹر ظفر مرزا وزارت قومی جان جوڑی ءِ سعودی حکومت تون رابطہ نا پارت کرینے۔ ڈاکٹر ظفر مرزا پارے کہ سعودی حکومت نا کمک اٹ پورو جاست وپاست کننگے، راستکیک مون آ بننگ آ سعودی حکومت نا کمک اٹ ویل ءِ ایسر کننگک۔ ڈاکٹر ظفر مرزا مستی پارے کہ مشکل نا ساہت اٹی اوورسیز ڈاکٹرآتے تنیا الیپنہ، وزیراعظم اوورسیز پاکستانی تے آسراتی تا فراوانی نا پارت کرینے۔ یات سلے کہ زہمی مروک آ گیشتر ڈاکٹر آتے سعودی وزارت جان جوڑی 2016ء ٹی کراچی، لاہور و اسلام آباد اٹی انٹرویو آن پد تعینات کننگاسس۔ سعودی عرب اٹی زہمی مروک آ ڈاکٹر عثمان نا رداٹ سعودی حکومت نا دا فیصلہ غان اودے بھاز شرمندگی مسنے۔ مصر سوڈان، بنگلہ دیش و ایلو ملک آتا ہندا ڈگری ءِ سعودی عرب اٹ امنا کننگک۔ ڈاکٹر عثمان مستی پارے کہ لاہور نا یونیورسٹی آف ہیلتھ سائنسز آن پنچ سالہ پوسٹ گریجویٹ کریٹ و لاہور جنرل ہسپتال اٹی تربیت دوئی کریٹ، اناگت سعودی وزارت جان جوڑی کنا نوکری نا کنٹریکٹ ءِ چٹفنگا۔ زہمی ڈاکٹر وزیراعظم پاکستان آن خواست کرے کہ او دا معاملہ نا نوٹس ءِ ہلے و پاکستان آن محکمہ جان جوڑی نا خلقت ءِ سعودی عرب آ گدریفے و او سعودی وزارت جان جوڑی نا کمامدار آتون ملر و ڈگری تے پک کیر تانکہ کیہی پاکستانی ڈاکٹر آتا نوکری تے بچفنگ مرے۔
