اسلام آباد۔09 اگست (اے پی پی) بنجائی وزیر کانود و انصاف ڈاکٹر بیرسٹر فروغ نسیم پارینے کہ بھارت مقبوضہ کشمیر ءِ بشخسا اقوام متحدہ نا قرارداد و شملہ معاہدہ نا خلاف ورزی ءِ کننگانے، پاکستان بھارت نا دا گام گیج نا برخلاف کانودی وسفارتی تون اوار غٹ آپشن آتے کاریم اٹ اتیک۔ داخیال آتا درشانی ءِ او اے پی پی تون خصوصی گپ و تران کرسا پارے کہ پاکستان ہمیشہ کشمیری تا سیاسی، اخلاقی و سفارتی مخ تفی ءِ کرینے۔ اوپارے کہ بھارت مقبوضہ کشمیر اٹی ظلم کننگ ءِ و انسانی حق انا سنگین خلاف ورزی تیٹی اوارے۔اوپارے کہ کشمیر نا بابت بھارت نا ساڑی آ گام گیج اقوام متحدہ نا قرارداد و منشورنا برخلاف ءِ۔ اقوام متحدہ نا قرارداد نا رداٹ اسہ ملک اس ہم جبری وڑاٹ علاقہ سے نا تین تون الحاق یا اودے اوار کننگ کپک۔ بھارت ساڑی آ گام گیج آن اقوام متحدہ نا ہندا قرارداد نا خلاف ورزی ءِ کرینے۔ اوپارے کہ وزیراعظم عمران خان دا ویل انا بابت خصوصی کمیٹی اس جوڑ کرینے ہراجتا کہول آ تینا کڑد ءِ ادا کننگ ءِ دا کمیٹی سلابت اٹ بھارتی گام گیج نا برخلاف سفارتی و ایلو گام گیج آتا بابت تینا سلاہ تے پیش کیک۔
