اسلام آباد۔ 09 اگست (اے پی پی) بنجائی وزیر ڈٹ بندی شونداری و اصلاحات مخدوم خسروبختیار پارینے کہ حکومت ملک اٹی جان جوڑی نا آسراتی تے گچین کننگ کن ترندی اٹ گام گیج کننگ ءِ، دا بابت وزیراعظم عمران خان جان جوڑی انصاف کارڈ مچ آ ملک اٹی غریب و نادار خلقت کن جاری کرینے ہراڑان خلقت مفت درمان نا آسراتی دوئی کننگ کیک۔ داخیال آتا درشانی ءِ او تدوک آ دے سینٹرل ڈویلپمنٹ ورکنگ پارٹی نا دیوان آن تران کرسا کرے۔ سی ڈی ڈبلیو پی نا دیوان اٹی جان جوڑی نا بابت 2ڈٹ پیش کننگا، ہراٹی اولیکو ڈٹ اے جے کے سیکنڈری کیئر ہسپتال اٹی ایکسرہ و الٹراساؤنڈ مشین تا فراوانی کن 20 ملین روپئی نا خڑچ انا پیش کننگا ہرادے دیوان اٹ منظور کننگا۔ نیشنل انسٹیٹیوٹ آف ہیلتھ اسلام آباد اٹی ویکسین نا فراوانی و فلنگ سسٹم ءِ گچین کننگ و سپلائی فلنگ لین نا اپ گریڈیشن کن 102.857 ملین روپئی نا خڑچ انا ڈٹ پیش کننگا ہرادے دیوان اٹ منظور کننگا۔
